大摩教訪客走出ICC迷陣

【明報專訊】摩根士丹利亞洲區總部，2008年由中環交易廣場搬到九龍站上蓋環球貿易廣場（ICC）。話就話係港鐵站上蓋物業，不過落咗港鐵站，要喺圓方商場行個大運，先至搵到商業大廈，小琴第一次去大摩時，都有啲迷失商場感覺。

溫馨指示 教點樣行上去

有人嚟探訪你，你都唔想客人氹氹轉，搵唔到門口㗎。小琴最近收到大摩一項活動邀請，附上一張溫馨指示圖，教訪客搭地鐵喺邊個站落車，落車後點樣行去大摩辦公室，仲有埋相片，話你知去到邊間舖頭，就要轉左轉右，安心直達商業大廈。駕車人士都照顧埋，落車點樣行去商業大廈，連附近停車場泊車每小時8蚊，都提醒埋你，真係夠晒窩心。

作為一間投資大行，每分鐘都係錢，要大客戶行嚟行去，左搵右搵，都真係幾唔方便。除咗大摩整張地圖，小琴建議ICC嘅新鴻基地產（0016）都諗諗計，增加多啲指示，先可吸引到跨國機構進駐。

報料電郵﹕piano@mingpao.com