人民日報評論 鬧某大行整跌A股

【明報專訊】阿爺一旦決心要做嘢其實都幾得人驚，好似今次要將通脹壓返落去咁，除咗加息、上調準備金率呢啲「碎料」，仲聯合唔同部門透過行政指令做嘢，而中央嘅喉舌齊齊配合，好似中央電視台就一連幾集猛轟香港成為熱錢天堂，有啲對冲基金囤積熱錢流入內地炒作。

最新鮮滾熱辣嘅係有學者喺《人民日報》，以評論員特約稿件嘅形式不點名咁狂插一間國際投資銀行，在11月12日A股大跌市時搞風搞雨、興風作浪。名為石建勳嘅同濟大學經濟與管理學院教授，以特約評論員身分喺《人民日報》海外版撰寫題為《中國股市，下一個20年怎麼走》嘅文章，石教授喺文內唔開名咁話「某國際知名投行向投資者群發賣出中國股票郵件」先至喺上個月12日A股大跌嘅導火線，仲話呢一間投資銀行有翻手為雲覆手為雨咁操縱股指牟利嘅嫌疑。

小琴都好想知道石教授所指嘅國際知名投資銀行究竟係邊一間呢？原來石教授仲畀咗少少貼士，就係呢一間大行剛剛先出咗份唱好內地股市前景嘅報告，小琴翻查嗰幾日嘅電郵同報告，發覺得高盛喺11月初時唱好H股以及有大比例內地股票嘅恒指，而咁啱又喺11月12日發電郵話A股好貴，要全面撤出A股市場喎，唔通……。