梁鳳儀 一套劇只睇3集

【明報專訊】梁鳳儀搞咗間跨媒體公司勤+緣（2366）之後，忙到唔得閒寫書，不過佢喺搜狐開咗微博，每日親自寫文分享，吸引唔少「粉絲」。佢話唔單止文字交流，每月仲會同粉絲聚會，人氣不遜於藝人。

集團製作電視劇喺內地播放，例如﹕《女人本色》、《大敦煌》。梁博士話每次拍攝完後，只會睇三集，就係第一集、中間抽一集同大結局。佢話睇劇本時已經知晒內容，唔需要追睇晒全套，睇幾集純粹了解拍攝情况。佢話好少睇本港劇集，所以小琴問佢鍾意邊個藝人時，佢嘅答案唔係呢期大熱嘅「劉醒」、「九姑娘」，而係紅遍內地嘅《潛伏》男、女主角姚晨同孫紅雷。《潛伏》喺內地華鼎電視劇頒獎禮中，橫掃各大獎項。梁博士果然係內地製作人，佢仲推介一齣《笑着活下去》，演員黃海波表現出色，梁博士會搵佢拍劇。大家近期追完台慶劇，新劇登場又未到戲肉，不妨睇吓梁博士推介。