美聯籲小業主 一人一信表態

【明報專訊】周初多間中小型代理行聯手反擊政府出招過重打壓樓市，甚至發動遊行抗擊政府重招，噙日就輪到龍頭大行美聯（1200）搞記招，美聯高級執董黃錦康喺會上話，呢次重招不單止對行內3萬多名從業員有影響，更重要係已經影響到真正上車客同換樓客嘅入市信心，甚至係110萬名小業主，故此集團呼籲全港市民一人一信，就呢次政府出招發表意見，集團稍後將收集到嘅意見轉介政府。

佢又講到，對於有業內人士發動遊行，集團立場係唔鼓勵亦唔支持。「集團係行內航空母艦，我哋做每樣事都會謀定而後動，希望香港有一個溫和嘅自由表達機制……其實社會唔支持代理嘅想法係錯誤，代理平均收入並唔係想像中咁高，個別代理1個月有賺成25萬元，但大部分只係每月賺萬多元，代理腰纏萬貫係一個謬誤！」佢地噙日亦公布向202名有意置業市民所進行嘅置業調查，發現有七成用家話暫時會擱置入市計劃。

唔鼓勵唔支持同業遊行

另一邊廂，採用較「激」手法表達嘅香港地產代理商總會主席朱建蘭透露，已向警方正式「入紙」申請喺本月19日發起地產業界大遊行，遊行隊伍屆時將由遮打花園遊行至政府總部，抗議政府就樓宇短炒徵新的重稅。佢又指出，若然政府堅持推行新稅項，3個月內恐會有物業代理行因捱唔住結業。

雖然美聯「潑冷水」，未有支持員工參加遊行，但朱建蘭估計屆時參加遊行者仍至少會有數千人，佢又指唔排除會同美聯同中原兩大行商討尋求支持。佢亦強調，絕非不滿政府打擊炒風，只係希望政府唔好「殺錯良民」，損害到普通用家以及地產代理生計。

報料電郵﹕piano@mingpao.com