超威上市未夠半年 CFO轉為非執董

【明報專訊】小琴對於上市公司換核數師，或者係有財務總監辭職一向都特別留心。

剛剛被傳媒「踢爆」污染山東吳家林村居民嘅鉛酸儲電池產銷商超威動力（0951），上市唔夠5個月就出現管理層變動，原本擔任財務總監、公司秘書兼公司接收傳票以及通告代理嘅吳智傑，已經辭任咗啱啱提及嘅3個上市公司職位，轉為非執行董事，收20萬人仔董事酬金另加花紅。

有別其他非執董 收20萬酬金

雖然超威嘅通告同其他上市公司管理層辭職通告一樣，強調吳智傑同董事會無出現意見分歧，不過奇就奇在通告無講到吳點解要辭職，淨係話佢會尋求其他事業發展機會，辭職即日生效。小琴仲留意到，另一個非執董鄧喜紅1蚊董事酬金都無攞，但偏偏吳智傑就可以攞20萬人仔？

現年37歲嘅吳智傑係今年1月先被委任做財務總監，超威7月7號上市到而家都未夠5個月，點解吳智傑咁快唔撈嘅？自己辭職定有人提出善意嘅建議呢？接替吳智傑嘅係細佢3年、只係得34歲嘅梁偉業。