QE2累金管局 Book唔到場賀聖誕

【明報專訊】QE2威力無遠弗屆，金管局亦「深受其害」，大家咪以為係QE2引咗啲乜大鱷嚟香港同金管局決戰國金之顛，其實小琴只係引述金管局總裁陳德霖話，熱錢氾濫下香港市道暢旺，金管局幾個月前想book定場同傳媒慶祝聖誕都向隅，結果要提前至噚日搞呢個聯歡晚宴喎！

其實一眾金管局要員，同銀行公會成員，經過一連三日北京上海之旅，本周三晚先至落機，但陳德霖翌日返完工，再直落同傳媒預祝聖誕，都咪話唔頻撲。陳德霖就解畫話，其實金管局幾個月前已開始籌備呢個一年一度嘅節目，之不過QE2效應下，消費市場鬼咁旺，想book個場都難，結果只得噚晚有場，咪唯有提早好多預祝聖誕囉。

上京面聖解釋熱錢無壓力

講開熱錢，內地央視近日高調「關注」（甚至責難）熱錢由香港流入大陸，陳德霖同一眾賓架正正就係喺呢個風頭火勢嘅時候「上京面聖」，不過陳德霖就話咁樣正好畀機會佢哋，親身向當地官員及傳媒解釋，唔覺得有壓力喎。