3D肉蒲團慘被韓片「截糊」

【明報專訊】由中國3D數碼（8078）投資嘅《3D肉蒲團》，一直標榜係全球首齣3D色情片，搞到小琴都心思思想去見識下有幾犀利。不過小琴啱啱發現，下周四（9日）有套韓國色情片《3D娜妲莉的情人》喺香港上畫，搶咗《肉蒲團》頭啖湯。

《娜妲莉》自稱全港第一部3D情慾電影，由韓國Sang Sang電影公司投資約1000萬元製作，故事改篇自韓國名著，全片以3D技術拍攝。該片早於10月28日喺韓國上畫，不過據報其票房麻麻，達唔到投資者預期。

蕭定一：歡迎比較

雖然慘被「截糊」，但中國3D數碼執行董事蕭定一仍然充滿自信，仲話歡迎觀眾比較兩套戲嘅分別。自己亦會買飛捧《娜妲莉》場，主要係見識下人哋嘅技術水平。阿一揶揄對手，指早前《娜妲莉》同《肉蒲團》咁啱一齊參加美國影視展覽賣埠，自己那套大受買家歡迎，對方則無人問津。

維園擺年宵 大電視播預告

阿一話，《肉蒲團》家已經成功賣埠法國、意大利、俄羅斯及秘魯，仲未上畫已經收回近七成投資。下一個目標係其他歐洲國家、美國同埋日本，預計去到出年2月柏林影展果時，電影就可以完全回本。

為咗宣傳影片，阿一又透露，集團最近豪擲10萬元，投了2個維園年宵攤位。現場除咗銷售電影紀念品，又會準備2部大電視，開放畀成年嘅市民優先觀賞《肉蒲團》三級版預告片。佢希望，到時攤位前會大排長龍，成功造勢。

報料電郵﹕piano@mingpao.com