郭二少獲頒博士 心情靚

【明報專訊】新地（0016）郭家二少（郭炳江）尋日心情靚靚，皆因獲公開大學，頒發工商管理榮譽博士學位。記者採訪他時，自然會問佢會點樣同家人慶祝。郭二少認真孝順，即刻話媽媽郭老太將在近排生日，所以一家人已經決定連隨一齊慶祝。

噚日的頒授儀式上，郭老太鄺肖卿，同三弟郭炳聯都有出席，捧郭二少嘅場。當然記者唔會放過呢個機會，再問佢哋兩兄弟同大佬郭炳湘的恩恩怨怨，江少只係耍手擰頭，話呢D係私人問題，一概不答。

其實本來新地公關已講明二少、三少同郭老太噚日都冇嘢講。但郭二少確實心情好，當記者們大嗌時，他也願意留低同大家講番幾分鐘。郭老太還應記者之邀，幫愛兒戴上博士帽，好讓大家可以拍照。記者問郭炳江會送乜嘢賀禮畀媽媽時，佢話「要由老婆諗」。