中國南車老總 最佳高鐵推銷員

【明報專訊】中國南車（1766）噚日開記者會唔係講業績，又唔係有咩發展大計，小琴即刻睇下佢搞邊科。董事長趙小剛一開始問答環節已經非常風騷，話面對在場嘅帥哥美女記者覺得好興奮，仲笑笑口話自己即時「變得更帥更年輕」，趙總公關手腕果然厲害，佢仲講講下營運表現，突然停低話終於收到等咗成朝嘅短訊，話公司試驗營運的新一代高速動車組，剛剛創下最快的紀錄時速，去到486.1公里咁話！

呢刻小琴先如夢初醒，知道今次記者會的召開目的！聽趙總話旗下京津高鐵營運兩周年，連天津老字號「狗不理包子」總經理都同佢講京津線開通後，10間舖頭營業額平均多咗兩成，部分仲多咗四成！趙總連婚禮市場都好關注，話家好多北京市民都會去天津結婚，貪佢平過北京之餘，親朋戚友都唔介意齊齊搭個短程高鐵去天津飲宴。趙總果然是高鐵的最佳推銷員。