Can Bank：載通有乜可憧憬？

【蘋果日報】載通（062）旗下九巴由年初大埔車禍至今，車長加薪要求未停過，先在3月1號起將獎金撥入底薪，上個星期五再宣佈加薪5%。上半年載通已因為九巴員工薪金以及油價上升而令業績倒退，股價累跌超過一成。
油價及員工成本一向係運輸行業大敵，今年上半年九巴總成本上升4.8%達到32.63億元，其中員工成本佔61.66%，今次加薪5%，員工成本增加約1億元，尚未計前線員工及主任職級以下今年有一個月底薪雙糧，估計約千多萬。加上油價由年初約60美元一桶升至74美元一桶，令載通百上加斤。
不過買載通的朋友都知道，載通即使本業唔算吸引，但揸住嘅地皮仍值得憧憬，目前五個車廠地皮是向政府購入，只有荔枝角車廠是向政府租用，暫未有聽聞轉換土地用途。
載通上一次轉換土地用途嘅地皮係觀塘巧明街車廠，於2016年完成補地價，預計將會係創紀之城嘅延申，新地（016）今年初公佈，有關項目要到2021至2023年才會落成，換言之，除非載通再有土地轉換用途，或者股價跌到一個地步，令股息率非常吸引，否則股價似乎都要再捱一會。
散子
http://fb.com/散子-257101397966975