憧憬貿戰緩和　港股反彈

【蘋果日報】中美周三至周四重啟貿易談判，市場憧憬有轉機，加上人民幣及A股反彈，港股昨日顯著反彈。恒指早市高開60點後，由騰訊（700）帶領下，升幅擴大，一度升近400點，高見27609點，並以接近全日高位收市，收報27598點，升384點或1.41%；H指升118點或1.13%，報10632點；主板成交936億元。
目前市場仍審慎
藍籌股普遍造好，騰訊重上350元，全日升逾4%，為表現最好藍籌；友邦（1299）升1.89%；中移動（941）7月份4G上客量按月增近1%，升2.05%；中海油（883）升3.34%；港交所（388）造好，升2%，跑贏大市。
舜宇（2382）跌勢未止，更曾急插6%，再創逾一年低位，全日跌1.69%。
港股回升，豐盛金融資產管理董事黃國英認為，是中美貿易談判前「冚淡倉」，他指出股市升幅集中，「基本上有兩個原因，第一個係冚淡倉，第二個就係啲人買貨都會比較驚，最近上個禮拜連環洗倉嗰啲板塊，突然間會輸好多，最穩陣博反彈都係買啲大嘢嘅衍生工具，或者買大嘢」；他認為，市場目前仍然審慎。
騰祺基金管理投資管理董事沈慶洪則認為，之前短期的不利因素已經發生，本周中美重啟貿易談判，「大家有啲憧憬，市場就有啲反彈，今日亦都升返，暫時睇返27800個位，之後再睇下中美貿易談判有無進展，無進展就上上落落，有進展再突破就上升」。他指出，昨日內地有國家隊入市令市場憧憬，「A股企定我哋就好啲」，但大前提要看A股可否站穩，「佢跌就累我哋，唔升企穩就OK」。