【姐匙Talk】有心人賣大包遭冷待

【蘋果日報】百足咁多爪嘅「有心人」，做生意嗰陣搞得有聲有色，早前仲雄心壯志撈埋製作，瞓身投資拍咗唔少好戲，贏到唔少口碑。不過有心人做得好又點，始終發唔到圍，仲俾人跣咗鑊甘，搞到佢投資咗好多錢拍嘅嘢，播放嘅渠道少之又少，就算喺網上播同賣畀海外仍然返唔到本，同丟錢落海冇分別。
幾個月前，有心人終於搭到路，將佢嘅作品賣畀電視台，姐匙仲聽聞有心人想多啲人睇到佢嘅作品，於是度咗唔少橋推介畀電視台高層，又拉攏行內人幫手，希望吸引多啲人關注，等觀眾知道有呢件事。有心人咁落力又點？電視台班高層懶懶閒，擺明冇打算攞錢出嚟搞宣傳，仲推番個波畀有心人，反建議交畀有心人嗰邊負責咁話。
慳錢拒宣傳
講真有心人又點會無啦啦叫藝人出席宣傳活動吖！版權已賣咗畀電視台，而且有心人亦冇咁多power叫得郁班藝人出活動撐場，要出面理應由電視台去請人嚟，而且畀番少少車馬費啲藝人亦好應該，但係電視台就寧願慳嗰少少錢，真係cheap到爆燈。
撰文：Jessie
本欄逢周五刊登
姐匙Talk
我姐匙縱橫歌影視幕後，咁多年嚟冷眼旁觀，娛樂圈大小事都走唔過我雙眼，真係頂唔順要爆啦！歡迎大家嚟剝花生。