【馮仁昭四圍超】亞姐着泳衣拍外景C Cup賴嘉瑩塞缽仔糕

【佛山直擊】將於下月7號舉行嘅《2018年亞洲小姐競選》香港區決賽，十位候選佳麗噚日到佛山拍外景，兼安排以泳裝會見傳媒。各佳麗身材膚色都算合格，其中1號賴嘉瑩、2號梁雪瑤同9號李芷菱身形較高，5號蘇頌筠就曬到一身古銅色肌膚最搶眼，同膚色最白嘅3號張靜茵有好強烈對比，而年紀最細係現年19歲嘅8號傅美霖，影相時亦表現得最緊張。
1號賴嘉瑩上圍最豐滿，但泳衣內嘅「缽仔糕」唔小心外露，佢接受訪問話有啲唔習慣着泳衣面對咁多人：「因為對自己身材唔係好滿意，主要係仲有少少肚腩仔，仲有兩個星期，希望可以努力去減。」有乜嘢突圍招數？佢笑住話：「我上圍有C Cup，到時比賽日我塞多兩個『缽仔糕』入去唔話畀其他佳麗知，到時咪E Cup囉！呢個係我秘密武器。」8號傅美霖話唔習慣着泳衣面對咁多人，平時去沙灘都會着多件T恤喺外面。
傅美霖唔習慣
至於5號蘇頌筠就話自己熱愛戶外活動，所以即使着泳衣拍攝都唔覺尷尬。9號李芷菱亦一樣冇尷尬：「平時去沙灘都係咁，做model都有影過泳裝。」
撰文：馮仁昭