【馮仁昭四圍超】余德丞開工阿媽監場

【蘋果日報】余德丞、岑麗香（香香）、黃翠如同麥美恩噚日喺旺角出席護膚品牌新店開幕，全面復工嘅余德丞狀態大勇：「做嘢見番好多人，開心好多。醫生話唔好做劇烈運動、飲酒，辣嘢、魚生都要戒，費事刺激到，不過我最鍾意飲嘅珍珠奶茶就飲咗兩次。」
因為戒口，余德丞話連皮膚都好咗，但拍劇要遲啲：「未開始住，睇吓有乜角色合適，我諗都唔會畀好重嘅角色我住，打嗰啲唔會啦！唔好理乜男一、男二、男三，有得做已經好開心，依家要重拾番工作嘅節奏先。」佢話媽咪因為擔心自己，特登嚟監場︰「佢成日提我要休息，佢會擔心，不過我好有定力，依家我都會搭巴士、地鐵，不過唔會追。」
香香米蘭掃貨
啱啱返港嘅香香，講起睇米蘭時裝周就興奮：「我不嬲對fashion有興趣，大學都想修fashion，今次可以坐front row，覺得係夢想成真。」問到有冇買嘢畀自己同老公強強？佢話︰「未破產，不過都有出手，都有買畀老公，但買畀自己多好多，我都有格價㗎，當地真係平好多。」