【姐匙Talk】奇異果遲到擺款得罪人

【蘋果日報】每年都有好多新人加入娛樂圈，藝人想紅除咗靠真本事，仲要講一命二運三風水，有啲紅得嚟受人尊敬，有啲就算紅咗都好乞人憎！我姐匙喺圈中咁多年，真係睇盡人生百態，呢行有句說話叫「未紅先驕」，唔少藝人就係衰喺呢四個字身上，好似「奇異果」咁，早排就因為態度囂張，得罪咗傳媒！
奇異果入行多年，拍過劇集出過唱片，仲做到女主角，但講真演技真係差一皮，所以一直都上唔到紅星級數，只係叫做過吓主角。話說有日奇異果出席一個群星活動，不過佢就姍姍來遲，記者梗係訪問幾位準時現身嘅藝人啦，當大家做晒嘢影完相預備走，遲到嘅奇異果行埋去記者堆，擺晒款咁話：「唔係唔訪問我嘛？今日唔問我，以後唔好問。」
有錢人前扮乖
記者見到奇異果發爛渣，覺得好好笑，所謂「面係人哋畀，架係自己丟」，奇異果又唔係巨星，又唔係新聞人物，又唔係有特別事要宣佈，仲要衰遲到罪喎！最後梗係冇人理佢啦，咁巴閉！話晒我姐匙同唔少巨星名人係friend，有次見到奇異果喺位有錢太太面前，表現得好乖巧好有禮貌，但對住記者原來係另一個樣，囂張寸爆，結果梗係自食惡果，俾人當番佢透明啦！
撰文：Jessie
本欄逢周五刊登
姐匙Talk
我姐匙縱橫歌影視幕後，咁多年嚟冷眼旁觀，娛樂圈大小事都走唔過我雙眼，真係頂唔順要爆啦！歡迎大家嚟剝花生。