【姐匙Talk】古惑仔撇女友狂舔老闆鞋底

【蘋果日報】娛圈跟紅頂白係人都明，機緣巧合憑一個角色上位簡直大有人在，好似「古惑仔」就係憑一個奸角上位，不過佢演呢啲角色真係好入型入格，因為佢未有知名度嗰陣，見到人都叫做有啲禮貌，會謙虛打招呼，不過當古惑仔自以為上咗位，成個人突然「轉性」，變得又招積、又躁底，遇上有事唔啱佢心意，佢會用好流利粗口喪鬧人，將戲中惡霸爛仔性格搬晒出嚟，唔知呢隻係咪叫相由心生，所以佢做嚟做去只能做呢啲壞角色，仲係上唔到大枱嗰隻。
扮大哥教前輩做戲
再講，古惑仔份人好白鴿眼，現實到爆，佢絕對係會「見高拜，見低踩」，當日佢為咗頴撈，會晚晚去夜場湊老闆陪飲、陪玩，飲大咗又口花花媾女，衰到仲要撇埋女朋友。古惑仔見到啲會揼錢投資開戲嘅老闆，立即大傍友上身，又陪飲、又擦鞋。古惑仔呢排媾唔到女，冇工開悶悶哋，佢就去翻撻舊愛，估唔到舊愛又成功俾佢冧翻轉頭。
我姐匙聽人講過古惑仔喺片場仲會突然上身扮大阿哥，跳掣向啲前輩發脾氣，仲要教人做戲，當正自己好好戲，不過好多前輩人品好同EQ高，當古惑仔係小學雞，但勢估唔到古惑仔就變本加厲，其實呢行咁冇品，即使上到位，但咁囂張只有自毀前途，好快都會跌番落嚟，到時可能仲死得好慘。
撰文：Jessie
本欄逢周五刊登
姐匙Talk
我姐匙縱橫歌影視幕後，咁多年嚟冷眼旁觀，娛樂圈大小事都走唔過我雙眼，真係頂唔順要爆啦！歡迎大家嚟剝花生。