存保會主席籲儲蓄助跌市買樓

【蘋果日報】【人物專訪】「小莫小於水滴、滙成大海汪洋、細莫細於沙粒、聚成大地四方……」當年銀行廣告歌教人儲一分一毫，存款保障委員會主席許敬文教授記憶猶新。時移世易，消費主義盛行，電視廣告教人借錢；樓價高企，年輕人更減少儲蓄，多去旅行填補空白，許敬文疑問：「依家好多人話不吃不喝都買唔到樓，你點知聽日樓價唔會大跌？」
有幫子女置業
不少人理想是買樓，先安居才能樂業，然而屢有調查指香港人不吃不喝19年才能夠買樓，每月出糧儲蓄來旅行，採取消極態度。學者出身、專研消費心理學的許敬文接受專訪時笑言，沒有儲蓄習慣難實現理想，「存保會調查有37%儲蓄係為不時之需，唔係死人冧樓，可能係一個投資機會，股樓大跌，但你冇儲到錢，連首期都畀唔到呀。」
許敬文承認現時香港經濟發展水平較以往高，好多父母選擇幫兒女，但應有前提，「如果佢哋有計劃、有奮鬥過，就好似天使投資者幫start-up，初頭都係睇吓你有冇努力過」。有3名子女的許敬文本身亦是慈父，有幫子女置業，「仔女節儉係可以幫，如果你一毫子都冇儲過，咁為人父親……都會幫嘅，只係心情會差好遠囉」。許敬文勸人儲蓄，比叫人「去少啲日本」易入耳，他憶述：「以前試過想買一個十幾蚊卡game，買嘢食剩低嘅錢就儲起，叫埋細佬妹一齊儲，之後都儲唔到，最終爸媽見儲得咁辛苦，幫埋最尾嗰部份」。
許2016年任存保會主席，但自言銀行存款不多，「教授要讀好多年書、結婚生仔，買樓借到盡、出糧用到盡，做嘢10年都冇乜儲過錢，到人工升咗、樓按還晒先有存款」。他一直教人分散存款，以用盡50萬元存保計劃福利，不過笑言自己並無遵守，「我比較怕麻煩，信用卡都係得一張」。近日股市波動，他亦勸股民「買股票從來係風險同回報嘅衡量，最緊要知道自己可以承受幾多風險，而個人仍然係開心」。
記者：周家誠