【馮仁昭四圍超】囝囝將首次睇爹哋騷小春洗腦式排練

【蘋果日報】陳小春噚日去九龍城排舞，準備周末喺成都舉行嘅首站巡迴演唱會。相隔十年再舉行個人演唱會，小春身形比之前更弗，佢仲話因為前後得一個月時間排練，所以每日着風褸排舞，令自己全身爆汗，夜晚就練歌記歌詞，然後再睇排練片，用洗腦方式令自己去記低歌詞舞步。
今次騷名起用囝囝Jasper一句名言「Stop Angry」，問小春會唔會安排囝囝上台？佢話：「唔好啦！細路仔，不過應該會畀佢睇，因為個騷都因佢而起，佢都係發起人要嚟進吓場。」小春又偷笑話囝囝未睇過演唱會，所以第一次睇騷係睇爹哋。再問小春，囝囝鍾唔鍾意跳舞？小春話Jasper鍾意郁但唔鍾意跳，帶佢學跆拳道就話：「好難。」到學踢波，佢就話：「好多人。」
想返港開戶外騷
成都站後，小春就會轉戰佛山、南京同武漢等地，問到會唔會巡迴返港？小春話要睇主辦方，佢又話舊年7月同黎明、張智霖喺中環海濱開騷，感覺好正，另外迪士尼園區開騷同樣吸引，佢話首選以上兩個場地，當然紅館都樂意。
撰文：馮仁昭