【馮仁昭四圍超】瑜伽養胎樂基兒陀B做豬媽

【蘋果日報】現年38歲嘅樂基兒（Gaile）12年同黎明結束四年婚姻，舊年8月再嫁經營健康食品生意圈外男友Ian，日前發現佢挺住個肚喺數碼港放狗，之後再聯絡佢求證係咪懷孕，Gaile就親口證實造人成功，依家陀B三個月，將做豬媽。
飲食口味變
當日早上10點幾，身穿短身黑T恤襯瑜伽褲嘅Gaile，肚凸凸現身數碼港海濱公園，雖然有家傭陪伴，但多數都係Gaile照顧愛犬，全程跑踎跳樣樣做齊，大約同狗狗玩咗20分鐘，Gaile搵張凳坐吓，最後同愛犬齊齊唞咗15分鐘左右就打道回府。
Gaile話：「依家係第二個懷孕周期，預產期係明年4、5月左右。」問佢首次陀B，懷孕初期有冇唔舒服？Gaile就話好好彩，唔係嘔得好犀利，又話驗孕知道有BB，佢同老公都好興奮，「我同老公都好興奮，因為大家都係第一次做父母，感覺好神奇，依家食嘢口味都有改變，以前鍾意食嘅依家都唔鍾意，但係我都食得好清。」至於BB係囝囝定囡囡？Gaile就話暫時想保持神秘唔透露住。
撰文：馮仁昭