拍《歡樂今宵》害死周星馳

【蘋果日報】張鳳妮在無綫九年，對她而言，拍《他來自江湖》如上了寶貴一課：「原來唔一定跟足劇本嘅，可以有少少走盞。達哥（吳孟達）同星爺（周星馳）仲好嘢，排完出嚟正式roll機都唔同，原來唔一定要死讀劇本，應該係吸收個劇本，然後用你自己方法去演繹。」鳳梨與星爺亦經常在《歡樂今宵》拍檔，直言多次害到對方：「我諗我害死佢好多次，因為我成日同佢講謎語，叫佢估謎底係乜嘢，到正式live，我一講謎面，我就將個謎底講出嚟，佢望住我問『咁你想我講乜？』」
險令李國麟分手
鳳梨跟李國麟在《同居三人組》演情侶，因為太過入戲，令李國麟當時女友呷醋鬧分手，最後大團圓結局，女友變成了今日的李太。原來張鳳妮全不知情：「我唔知喎？佢（李國麟）冇同我講，但我覺得有發揮，梗係盡力發揮做到最好，如果令到佢女朋友妒忌，即係我做得好啦。但我同佢冇嘢㗎嘛！好對唔住，你幫我同佢講好對唔住。」