【娛樂人物】駱應鈞拒回巢：我點捱嗰種通告

【蘋果日報】入行逾40年的駱應鈞，於無綫拍過不少經典劇集，11年離巢，加盟港視擔重戲，可惜港視不獲發牌，駱應鈞無奈約滿離開，現主要到內地拍網絡電影。重提港視不獲發牌，他依然激動起火。雖然無綫曾邀他回巢，但他卻拒吃回頭草，他說不想再為綠葉角色，捱更抵夜拍攝︰「我點捱嗰種通告！」
邵氏出身的駱應鈞，75年轉投無綫藝員訓練班，一做就三十年，演繹過不少經典角色，包括90年代《壹號皇庭》系列中，飾演忠厚警長周文彬，還有94年《射鵰英雄傳》、95年《神鵰俠侶》兩演黃藥師及01年《倚天屠龍記》的金毛獅王，更被譽為「最佳金毛獅王」之一。
多年在無綫鬱鬱不得志，駱應鈞在11年離巢，過檔香港電視，可惜港視不獲發牌。雖然口說不在乎，但駱應鈞卻越講越火︰「冇失望，當初四揀二已經知道機會最渺茫，睇到佢點搬龍門，唔係點會搞到香港撕裂。」
斥梁振英改變規則
駱應鈞指是兩屆前特首曾蔭權與梁振英之間的問題︰「曾蔭權想發多啲免費牌，嗰陣王維基畀佢講完心郁郁，大家都知發牌唔係問題。點知真係唔畀，最後咪搞到亞視出醜，一路唔拔喉，全部都係政府做㗎嘛。」他續說：「唔發牌畀佢係因為可能市場承受唔到咁多，我唔想佢蝕錢，關你乜事！商業社會，依家街上有條友話用500萬租個舖，唔通你話唔租呀。香港遊戲規則一路唔係咁，係佢改變咗。」
即使無綫之後「召回家」，駱應鈞都堅拒回巢︰「唔會喇，依家適應咗自僱生涯。」問到有好劇本或角色會否心動？他笑笑口說︰ 「你覺得正嘅，可能我唔係覺得咁正，同埋我點捱嗰種通告……解釋詳細少少，例如你係主角，今日15場，我係配角佔你3份1箒，但15場得4、5場都『揼』咁耐時間，慣例主角第二朝唔使開第一場，搵其他人攝，咁配角多數都中，大家辛苦程度唔會差好遠。」他指無綫曾找過他四、五次，更自信說︰「據聞當初只召回兩個，我係其中一個。」
熟悉制度欠新鮮感
駱應鈞在無綫多年，他坦言已看清裏面的規則：「我哋太熟個制度，邊啲可以做、邊啲唔可以做，完全冇刺激、冇新鮮感。」一向有自己的堅持的駱應鈞，即使在內地拍網絡電影，他會堅持講廣東話。他解釋：「如果用普通話講台詞，會打亂我演戲節奏。其實我溝通冇問題，但普通話唔流利。」
在無綫拍劇30年，原來駱應鈞從未想過做主角：「有啲人恨，因為當時佢哋抱住嘅觀念，只有做主角先有優待同人工高啲，但依家新人出嚟，就算你做主角，可能都係全組人工最低嗰個，我份人比較實際，唔會幻想。」
撰文︰嵐山
攝影：沈健程
場地提供：China Tang@尖沙嘴