【姐匙Talk】犀利哥拒屈服道歉

【蘋果日報】電視藝人有句口頭禪：「呢個世界有幾多個柴九吖？！」因為做演員捱足幾十年冇出頭天，真係家常便飯，即使有樣又有演技都未必可以上位，真係好靠運氣。好似「犀利哥」縱橫演藝圈超過30年，雖然從未上過一線，但人人都讚佢演技出色，扮乜似乜。幾年前終於有機會放眼世界，過檔「百科」做阿哥，劇接劇冇停手。可惜百科冇牙力，最後要收檔，影響唔少人生計，包括犀利哥。
拍網劇登台維生
犀利哥都係有家室嘅人，日日望天打卦等開工都唔係辦法，眼見唔少過檔嘅同行都要「跪低」返舊公司抓撈，犀利哥都試過搭路回巢。不過姐匙聽講舊公司好mean，出嘅條件竟然要犀利哥公開道歉，將之前數落舊公司嘅說話，要佢全部收番晒。犀利哥知道後，當然好唔忿氣，覺得之前講嘅嘢都係肺腑之言，唔係有心針對，而係想製作有進步，所以決定唔道歉。
舊公司當然唔會讓步，犀利哥就繼續等工開，好彩佢仲有啲知名度，可以返內地拍吓網劇，登台做吓騷搵食，甚至連江湖飯局都會畀面出席，雖然唔可以餐餐大魚大肉，但總算三餐溫飽。
撰文：Jessie
本欄逢周五刊登
姐匙Talk
我姐匙縱橫歌影視幕後，咁多年嚟冷眼旁觀，娛樂圈大小事都走唔過我雙眼，真係頂唔順要爆啦！歡迎大家嚟剝花生。