【娛樂人物】種族迷失俄仔廣東腔　混血Asha：我係港人

【蘋果日報】來自俄羅斯的俄仔Ansheles，講得一口流利廣東話，他在ViuTV主持節目時已大受歡迎，最近更參演劇集，要他背誦對白卻大有難度，主因他只會講廣東話，但不會讀寫中文，所以收到劇本時，要找人繙譯再拼音寫低對白，消化劇本內容。
撰文：張俊銘
攝影：陳慧安
由俄仔Ansheles、徐糵喬（Asha）及駱振偉等主演ViuTV劇集《迷失假期》，劇中有不同種族演出，故事講述英國少女來港尋根。三人日前於葵涌接受本報專訪。Ansheles飾演隻身來港的烏克蘭人，他在劇中獲賓館老闆余安安照顧，Ansheles說：「劇中我有任何要求，安安姐都會幫我手，戲外都照顧我哋好多，安安姐係一個資深演員，今次所有演員都比較新，我哋唔夠經驗拍劇，多得安安姐引導我哋。」
來自俄羅斯的Ansheles雖然講得一口流利廣東話，但是卻不會看中文，所以睇劇本時會遇上困難，他說：「我特別困難，收到劇本嘅時候，我唔識睇中文字，冇人特別會為我拼音，就算拼咗音都唔明意思，除咗記得發音，仲要擺感情入去，如果唔知個字講乜，係唔知點放感情去演。香港拍劇特別難，喺拍攝前一日先收到劇本，我唔知係啲乜，又要練習，所以對白唔多，每次都要人哋讀畀我聽，一班演員好sweet，成日同我練習幫我繙譯。」
比港女更MK
從小在香港成長的Asha，是英國及菲律賓混血兒，但由於在香港土生土長，可算得上是香港人。她表示識睇中文，聽和講都沒有問題，Asha說：「我識睇識寫中文，但我最大嘅問題係記性，我記性好差，而廣東話其實都生疏咗少少，因為第一次拍劇有壓力，好驚自己做得唔夠好，放啱咗感情都會懷疑自己係咪做得最好。對住安安姐好緊張，我唔想辜負佢嘅期望。」身份特別的Asha自言：「我永遠都答自己係香港人，最近喺英國習慣番少少生活，但係個底都係香港人，從幼稚園、小學、中學都係香港生活方式，去唱K、去旺角影貼紙相，自己比香港女仔更MK妹，返嚟香港習慣緊生活急促節奏。」
駱振偉似阿叔
駱振偉飾演不喜歡香港的香港人，在劇中會追求Asha，他說：「我飾演唯一一個香港人嘅角色，但係我嘅角色係最唔鍾意香港嗰個，佢哋其他人都好enjoy喺香港，同佢哋合作我變咗好似阿叔咁，我拍劇唔算好有經驗，上年拍好緊張，當我見到佢哋，我就唔可能緊張，當然我對住安安姐就緊張，記得拍完嘅時候，導演話覺得我淡定，我話我惟有扮出嚟，大家合作氣氛好好，成班人好有團體精神，感情、默契都幾好。」
場地提供：Lazy Boss
形象（駱振偉）：Lilian
髮型、化妝（Ansheles）：Becky Kwan
俄仔
英文名：Artem Ansheles
年齡：24歲
出生地：俄羅斯
入行經過：任模特兒，後修讀粵語課程，16年加入ViuTV做主持，節目《快樂童盟》、《Girls' Talk》和《返歸啦俄仔》等。
徐糵喬
英文名：Asha Cuthbert
年齡：27歲
出生地：香港，父親是英國人、母親是菲律賓人
入行經過：08年活躍YouTube，因愛拍片分享成為網紅，15年憑無綫節目《網絡挑機》短片上位，同時兼任模特兒，16年加入ViuTV主持節目《快樂童盟》和《兩面不是人》等。