陳凱琳讚老公型過碧咸

【蘋果日報】「萬人迷」碧咸（David Beckham）前晚現身金鐘出席活動，陳凱琳（Grace）、余德丞及袁澧林為活動擔任嘉賓，碧咸盡顯親民，大方揮手任影。Grace成功與碧咸集郵，大讚對方有型，頸後紋身好man，記者問到她老公鄭嘉穎還是碧咸靚仔，她笑言：「我一定要揀老公， 喺我心目中自己嗰個係最好嘅。」
問到Grace會否要求嘉穎學碧咸紋身，她表示：「冇得逼，我自己接受紋身，覺得紋喺耳後好sexy。」最後問到會否一齊去製造愛的紋身，她表示：「可以呀！ 例如一啲紀念性嘅日子，大家覺得有意義嘅都可以，或者自己嘅骨肉，將來都有得諗 。」此外，余德丞透露最近重返當日暈倒的球場支持隊友，笑言在場邊踢了兩腳「止痕」：「專登唔帶波boots去，斬腳趾避沙蟲。」
採訪：羅慧敏
攝影：陳慧安