【娛樂人物】黎學勤旅行攻略

【蘋果日報】黎學勤（Jeffery）一個陌生的名字，不過當他念出「同一間酒店 有唔同價錢」這句廣告口號之後，相信大家都有頭緒。亦因為這個旅遊網站廣告，令Jeffery工作不斷。他本身是游泳教練兼model，而女友林洛鍶就曾經參選港姐。
撰文：曹家誠
攝影：陳慧安
黎學勤日前在銅鑼灣接受《蘋果》專訪時笑言現在外出都會被人認出，他說：「好多人第一時間就係話，我係sell酒店嗰個人，或者話我係廣告入面嗰個鬍鬚仔，而且亦有唔少小朋友認得我，係好開心嘅。」 早前與女友去台灣旅行，因為廣告有台灣版，所以有不少當地人認得自己，滿足感非常大。
學識影靚女友
廣告之後他被視為旅遊達人，事實上Jeffery經常旅行，亦有自己一套標準：「我都係鍾意自己plan行程，同女友周圍去搵嘢食，而且我哋兩個鍾意捐窿捐罅，每次去旅行都會遠離大城市同商場，去啲小鎮度睇吓人哋啲風土人情同地道美食，好似啱啱就去完台中，我哋都好鍾意呢個地方，好欣賞佢哋生活節奏好慢。」
作為男友的Jeffery於行程中為女友拍照，被視為理所當然，他笑言仍然在學習階段：「雖然唔叻，但都OK嘅。俾女友投訴影得唔好都係基本嘢，係日常生活之一，我都俾佢訓練咗好耐，終於知道點樣低抄可以影得佢高啲靚啲，依家平均影五張相就有一張佢會收貨，已經比以前進步咗。」
談到參與一個電競比賽工作，Jeffery說：「係一個賽車遊戲，自己好鍾意，細個曾經夢想做賽車手，雖然依家呢個係虛擬比賽，但我一樣好有興趣。」Jeffery又透露，女友跟他一樣熱愛打機，而為準備比賽，晚晚都可以名正言順打機練習。