「仲有一口氣都唔會放棄」47歲小儀等待愛情

【蘋果日報】【娛樂人物】阮小儀在商台做DJ已有22年，在工作上找到長期飯碗，但感情路上仍未有着落。雖已達47歲中女之齡，小儀對愛情仍有憧憬，希望可以尋找到心靈伴侶：「仲有一口氣都唔會放棄。」對於另一半的門檻，小儀表示不介意姊弟戀或對方是失婚人士，亦不強求要結婚。
撰文：余燕儀
攝影：陳俊強
小儀96年加入商台做DJ，同一份工打足22年，近年更拍電影及電視，事業發展平穩，但愛情上仍然尋尋覓覓，她日前接受本報專訪，問到她若轉行想做甚麼時，她笑說：「梗係想做家庭主婦啦，哈哈哈！如果轉行嘅話，我希望可以做同動物有關，如果唔諗錢，做義工開心嘅，冇壓力，我好知足，比上不足比下有餘，同森美、林海峰比梗係唔得，但我一個屋邨妹，有依家生活已經好滿足。」
有伴緊要過老公
小儀早年經森美介紹下與出版社高層黃志暉拍拖，不過09年分手後單身至今。小儀雖想做家庭主婦，但認為女人不一定要結婚：「女人最緊要有個伴，身份唔一定係老公，年紀越大發現老公不忠，離婚手續好繁複，如果係伴侶隨時拍吓籮柚走，係相愛嘅話唔需要婚書。」
對於愛情，小儀仍未放棄：「努力中，仲有一口氣都唔會放棄，因為身邊好多單身女仔選擇放棄，覺得自己四十幾歲，唔係被揀之列，但我覺得唔好咁灰心，首先好多弟弟鍾意姐姐仔，失婚男士都唔差，有經歷反而為對方着想。身邊男人同我差唔多年紀，佢哋想識二十幾歲，但真係追到原來唔開心，每日都擔驚受怕，最終都係散，所以搵差唔多年紀係舒服啲。我唔係嫁唔出，未嫁箒！」
鬚根大男人吸引
問到小儀心目中的白馬王子，她畫畫表達：「塊面有好多鬚根，男人有好多毛髮好吸引，我唔要佢好似猩猩咁多心口毛手毛，但剃完鬚塊面有少少䊹䊹哋，感覺好有安全感，呢啲先係男人。我幾鍾意有少少大男人性格，佢要生活上智慧叻，我係小富婆，唔使佢辛苦賺錢，最緊要氹到姐姐我開心！」
入行多年，最佳拍檔一定是森美，小儀直言他是人生導師：「其實好多人會問，森美對你咁衰，點解係你人生導師？因為在公在私好多嘢我習慣問佢，我哋合作二十年，我經歷過好多次失戀，好多時第一時間話佢知，佢用森美另類方法教我點樣釋懷。」
自備保聲水傍身
小儀靠把聲搵食，曾受失聲之苦的她有一套護聲秘方：「要講嘢慢啲，用喉嚨發聲好傷聲帶，嗰時唔識用丹田技巧，聲帶損咗，講嘢漏風同聲沙。」她又會去中醫針灸及自備薄荷葉、人參葉和甘草片沖水的「保聲水」傍身。
去年小儀因扁桃腺影響聲帶，繼而發現有逾4cm囊腫要做切除甲狀腺手術，她說：「條頸好似俾人鍊住，隻手痹痛越嚟越嚴重。依家甲狀腺冇咗，要食一世補充劑。做咗手術，手臂痹痛冇咗，但另一個痹痛又嚟，我估坐姿影響頸骨。」