「宇宙最強秘書」修補與父母關係何綺雲：貓救咗我

【蘋果日報】【娛樂人物】何綺雲於無綫工作17年，向來有「御用秘書」之稱，近日再度回歸拍處境劇。雖然她近年曝光率大減，但這段期間卻意外地因為收養貓貓而修補好與父母的關係，她說：「隻貓救咗我。」自嘲是「宇宙最強秘書」的她，可說因禍得福。
採訪：何慧斯
攝影：沈健程
何綺雲早前被調離處境劇，曝光率大減，被網友笑稱是「失蹤人口」，最近她重新加入《愛．回家之開心速遞》，開始再頻頻出現公仔箱。日前何綺雲接受《蘋果》訪問，坦言在「失蹤」期間，意外地修補與父母的關係，因17年前父母都反對她入行。她說：「其實嗰陣唔止爸爸媽媽唔諒解，身邊嘅朋友都係一樣唔係好諒解我，有啲朋友都話『好心你做咗咁多年都係咁，你不如唔好做啦！』其實呢啲說話真係好傷害。」
多了溝通機會
卒之破冰機會來了，原因多得何綺雲做了貓義工而收養的貓貓，何綺雲說：「因為嗰隻貓唔可以同屋企啲貓相處，於是乎我就膽粗粗拎佢去媽咪度。」自此她多了一個與父母溝通的機會：「喺呢一年好似真係畀機會我去孝順番佢哋囉，我日日都會返去煮飯畀佢哋食，關係突然之間拉近咗好多。」
問是否要多謝貓貓？何綺雲感慨地說：「可能有人覺得好似我救咗隻貓，但係其實調番轉頭諗，係隻貓救咗我，如果唔係佢，呢一年唔會成日返屋企。」
事隔多年，如今父母接受何綺雲的演員身份嗎？她說：「其實都接受咗，少咗好多反對聲音，好似前排佢哋有睇《逆緣》，仲話聽到啲鄰居讚個女做得好好，佢冇同我講做得好定唔好，但係見到佢哋好開心。」去年台慶向何綺雲等綠葉致敬，當時她笑言自己是「宇宙最強秘書」，何綺雲說連媽媽都讚她：「我諗嗰一幕係幫到我，我阿媽嗰日仲同我講點解你好似好端莊，我聽完之後都覺得好好笑。」
內斂性格碰釘
其實內斂的性格，令何綺雲多年來在家庭及事業都碰過不少釘：「記得有一次劇集宣傳，有一個朋友去咗現場陪我，點知完咗活動佢問點解我個樣咁黑，好似想殺人咁，仲問我係咪好唔開心？」
當時何綺雲感到莫名其妙：「我嗰陣係笑緊㗎！原來我一直都畀人呢個感覺。」她自知冷酷外表是障礙，難得她淡然地說：「我覺得一個演員除咗做戲，本身嘅性格都係好緊要㗎！我都接受咗自己嘅性格。」訪問尾聲，她表示要多謝伯樂：「我好想多謝Amy（監製王心慰），佢畀咗好多有啲戲做嘅角色我，如果唔係佢，我諗都唔知點樣喺TVB生存。」
拍拖逾20年不婚
何綺雲有個拍拖逾20年的圈外男友，她感激男友尊重她多年來堅持從事娛樂圈的選擇：「佢好明白我嘅性格，佢會覺得冇所謂，等我自己去睇吓可以生存幾耐，始終佢唔係呢一行，好多嘢都唔明，但都算係支持嘅，起碼冇叫過我不如你唔好做啦，佢知我鍾意做戲，等我自己開心。」
不過何綺雲坦言兩人不會結婚：「我覺得依家同結婚冇乜分別，大家好明白對方已經超越咗一般愛人嘅關係，已經係家人。」
場地提供：The AIR（The ONE）