【姐匙Talk】孤冷趁漢堡患癌翻撻

【蘋果日報】一向敢愛敢恨，唔理外間睇法嘅「漢堡」，媾女真係有啲辦法，佢同「孤冷」欲斷難斷嘅一段情，最終又喺番一齊，真係令外界跌晒眼鏡，聽講今次漢堡同孤冷舊情復熾，完全係因為漢堡患癌。唔講唔知，近年成日喺內地做嘢嘅漢堡，唔知係咪食得加料製品太多，有次返嚟香港做檢查，發現患咗腸癌，好彩係初期，做手術切咗小部份腸就可以好番。
聽講漢堡唔想嚇親屋企兩老，所以冇同屋企人講過，就連佢嘅經理人公司都唔知，免有人漏風聲，講出去又引起是非。但係孤冷唔知點解知道咗漢堡有病，仲主動搵漢堡，勸佢一定要盡快睇好個病唔好拖，因為咁，兩個人又密切來往，再加上基本上大家都未忘情，自然好快又翻撻番。
全家人都唔睇好
人有時就係咁，當面臨生死問題就會特別懂得珍惜。佢哋重修舊好之後，感情仲好過以前，之不過佢哋嘅家人就唔係咁睇好，但又阻止唔到，所以惟有唔講當冇事發生。尤其漢堡媽成日覺得漢堡可以搵個更加好條件嘅，不過漢堡向來鍾意先斬後奏，特別係感情事，漢堡覺得阿媽諗法同自己好極端，為免傷感情，佢就係拖得幾耐得幾耐，明知阿媽嬲唔落，好快就冇事。
撰文：Jessie
本欄逢周五刊登
姐匙Talk
我姐匙縱橫歌影視幕後，咁多年嚟冷眼旁觀，娛樂圈大小事都走唔過我雙眼，真係頂唔順要爆啦！歡迎大家嚟剝花生。