【娛樂人物】劉德華　劫後開竅

【蘋果日報】劉德華早前接受DJ好友雲妮（Vani）的電台節目訪問，去年1月拍廣告墮馬受傷的華仔，被外界指經過大劫後脫胎換骨，在訪問中罕有地談及家庭，自言對愛人未夠直白，反而對朋友可以兩脇插刀。當憶述留院的日子，華仔坦言最難受及尷尬是要護士遞尿壺，令他沒有得再堅持自己是偶像劉德華。
撰文：李森
劉德華早前接受了Vani主持的節目《雲妮鍾情》訪問，訪問在前晚及昨晚播出。節目中Vani講到今年5月完成七個小時手術後，半夢半醒就見到華仔的生果籃，感到很開心，當講起二人相識28年經過時，Vani更一度感觸落淚。
對愛人唔直白
訪問中，Vani單刀直入問華仔在愛情方面是否一個直白的人，華仔說：「最唔直白係對住愛人，屋企我會表達，係唔知點解，可能拍戲習慣咗一啲可歌可泣嘅愛情故事打動你，可能生離死別先會感動，細水長流嘅歌曲唔會太打動我。」
華仔表示可能經歷太多戲中人生之故，同時角色的愛情觀，或多或少是自己的投射，他用電影《天若有情》為例解釋：「即係話JoJo（吳倩蓮）、華Dee（劉德華）我都記得嘅，我哋談戀愛時經歷過，到底係朋友定係愛情呢？其實愛情我好精忠，到一個critical moment朋友需要我，我可能擺低女朋友 。」華仔補充：「現實中如果有朋友失戀，需要自己嘅時候，就算依家同女朋友食緊飯，我都會話sorry，安撫咗佢，自己就偷偷地走咗去。」
Vani又問到華仔由私生活密不透風到近日肯講另一半，是因為經過大劫後脫胎換骨，華仔否認：「從來冇介意過，只係未係時候。因為可能兩方面協調，另一半習慣見到我，唔習慣見到你，等佢喺一個comfort zone。」
痛到冇晒矜持
華仔更用去年墮馬意外來解釋：「唔會跌一跌就叻咗，只係明白多一樣嘢，會突然有嘢影響你全盤計劃，人生所有嘢準備好晒都要停。當我卧床三個月，以為可以落地行，原來唔得，仲要坐輪椅。」前後經歷八個月才能落地，從頭兩個月可以離開病床開始，華仔就鍛煉自己雙手由床上落輪椅去廁所：「之前仲要接受姑娘遞個尿壺畀你。」
華仔表示第一、二日要人遞尿壺覺得好尷尬，到第三日才明白大家各自做緊各自角色，華仔說：「個角色一定要清楚，唔係話病嘅時候我都要係劉德華，冇得扮，惟有你話畀佢聽我靚仔喺心靈，用第二方面再呃過佢。」
華仔形容墮馬受傷是人生最痛一次，他回想當日落機後入院，因為太痛而失去矜持：「機上有個好好麻醉師，我迷迷糊糊咁，佢叫我痛就叫佢，但去到醫院等咗大約兩個鐘，麻醉針過咗就要過床去照磁力共振，嘩！唔知嗰個護士會唔會鬧我，我一轉身，嗰種痛我真係冇辦法，我喺佢右邊個手瓜一揸就揸落去，我嗌咗三秒鐘，但係佢好冷靜咁叫我定啲嚟，嗰個護士好後生，我諗係新護士，我痛到冇晒矜持。」