蘋人誌：只有偏鋒　先會成功清潔龍2.0　幕後玩家

【蘋果日報】近期，各個政府部門吉祥物之間的較勁如火如荼。以一身「cult系」藍色緊身衣造型示人的消防處代言人「任何仁」甫一登場，瞬間獲廣大市民支持，有望打低深入民心的環境局「大嘥鬼」。
不過，在芸芸選手之中，後起之秀食環署的「清潔龍阿德」亦不容小覷。秉承着「只要偏鋒，先會成功」的八字真言，過去一年多，阿德背後的主腦──來自外判廣告公司的一個五人小隊，曾二創中大和聲beat、親身在天台大跳campfire、到動漫節cosplay阿德，早前更「踩過界」，在音樂節Clockenflap以rapper身份登台獻唱。一夜之間，阿德成為最型的政府吉祥物。
別人笑我太瘋癲，其實每一個like都得來不易。「你要真係信咗件事先，如果你唔係真心想做，你係唔會做呢啲黐線嘢。當觀眾見到你好認真去做呢樣嘢，就會好鍾意。」
為了吸like，你可以去到幾盡？
記者：陳芷昕　攝影：王心義
隨着一首《我今天出了一首TRAP MUSIC叫做我叫做KEEP CLEAN AMBASSADOR》輕鬆於兩周內在facebook奪得過十萬點擊率，清潔龍阿德獲網民集氣，成功「被推上」香港年度音樂盛事Clockenflap的舞台，擔任本地Hip Hop組合米奇老味神奇屋的暖場嘉賓。消息在專頁上一傳出，馬上引起網民熱烈討論，更有人問：「阿德，你紅定任何仁紅？」「任何仁係藍！」一番妙問妙答獲網民大派過千「心心」，揚言要為阿德買票入場以示支持。
表演當晚，不少樂迷早已湧到舞台，喝着啤酒靜待好戲上演。耳熟能詳的音樂揚起，一如以往身穿工人牛仔褲和粉紅色球鞋的清潔龍「Lil Tak」率先現身，背後的團隊成員亦相繼登場並高喊：「我就係清潔龍阿德！你有冇like我哋個page呀？我哋要追數呀！」全場報以熱烈的歡呼聲，更跟着強勁節拍興奮跳動，一同合唱「我個名叫Keep Clean Ambassador，保持衞生你我就係Brother」。團隊最後更送上溫馨提示：「阿德話，我哋今日嚟到唔係淨係唱歌㗎，大家記得要執返啲垃圾！」再在全場觀眾高舉「Rock and Roll」手勢和尖叫聲下離場。
如果說一個成功的男人背後總有一個偉大的女人，清潔龍阿德的背後就有五個人。他們是來自科域盈創（Fevaworks Solutions）的團隊，包括內容營銷總監Rondo、設計師及導演Ruck、負責美術設計的Rain、動畫製作的Debbie，以及擔任阿德聲優的Ceci。自去年團隊成功投標後，五人從去年六月起經營清潔龍阿德的facebook專頁，每月至少推出10個帖文，向港人宣揚清潔香港的訊息。在這近一年半間，他們已為專頁帶來快近20,000個like。
有血有肉　會嬲會唔開心，同人一樣
專頁上，阿德的個人簡介上寫道：「阿德，土生土長唔離地，真正『清潔龍』粉，所以勁Like乾淨。」不過，其實阿德的造型和人物設定都並非由這五人團隊原創。「清潔龍」家族早見於90年代，包括有「清潔龍」、「沙灘龍」、「郊野龍」及兩條小龍「小清」和「小潔」。2016年，食環署正式委任第二代「清潔龍阿德」為清潔香港大使，並為他推出facebook專頁。在上一任廣告公司設計完阿德的外形和性格特徵後，到五人接手時，他們的任務就是要「捧紅」阿德。
五人先花了一點時間去揣摩阿德的性格，因為經營他的專頁，就要把自己代入阿德的世界和價值觀，以加強其親切感，讓網民覺得「人人都可以係阿德」。「我哋每次坐低，唔係即刻諗出咩post，係諗呢個人嘅性格係點。」Rondo認為，阿德本來是一個很簡單、平面的角色，「我清潔就好開心，只係得呢樣嘢，但我哋將佢立體化，好似人一樣。佢見到唔乾淨嘅嘢會唔開心、會憤怒。同埋佢都會有失敗嘅時候，原來唔係自己一個清潔，就可以乾淨，從而帶出清潔係每一個人嘅責任。」在五人的共創下，阿德成了一個有血有肉的「小男孩」，喜歡扮鬼扮馬，更曾以「龍形」天線得得B、姜濤等形象示人，他也是一個渴望有女朋友的「毒男」。在原來只有父親的人物設定下，五人更在一連八集的動畫《阿德英雄傳》中，為阿德創造了更多家人和朋友，包括打擊老鼠和滅蚊的貓俠和機械人等角色。
任何玩法　離不開中心思想──清潔
只是，有再精采的人物角色，宣揚清潔彷彿是一個「原罪」，就像沙士肆虐時董太叫人「千祈千祈千祈，洗手洗手洗手」一樣，官式口號令人乏味。「就咁講清潔係悶嘅，其實來來去去都係叫你清積水、清垃圾，所以我哋諗，只要偏鋒，先會成功。」對五人來說，不論是原創或二創，創作就是要不斷做讓人「估你唔到」的內容，以突圍而出。如早前香港爆發登革熱，他們推出滅蚊廣告，二創電影《頭文字D》中「三萬蚊，過夜呀！」成「三萬隻蚊」，連原角杜汶澤也不禁要share。
本身熱愛外國memes的Ruck亦常思考如何把清潔置於不同的小眾文化中，「識嘅人就會好high，估唔到阿德都會做呢啲嘢，咁就可以吸引到呢班本來唔會特別去睇呢個page嘅人。」就像最近推出的trap music，「冇人估到阿德會唱歌、甚至係唱trap，亦冇人估到我哋真係唱到。」
問題是，「老細」食環署又曾否有微言呢？「你覺得呢？我哋trap music都出咗。」Rondo認為，要讓意念得以順利通過，除了客人需要尊重創作自由，團隊亦有責任讓客人對他們有信心。團隊推出這首一炮而紅的trap music前，其實於年頭時已想為阿德寫一首歌。「一開始未決定用咩音樂類型，諗諗吓不如寫首trap，因為trap嘅內容都係圍繞毒品、女人、錢，如果我哋寫首無敵正經、宣揚清潔嘅trap，應該幾正。」
有了意念，就要再靜待時機，「等到有班中學生都出咗首trap宣傳學生會，再同客講呢件事係潮流、會work，令佢哋更有信心。」但最重要的，還是Rondo多次強調的中心思想（objective）。「我哋做任何嘢都係指向返中心思想──清潔，如果用個account做自己開心嘅嘢，咁就好自私啦。」配合兇狠強勁的音樂節拍，團隊rap出滅鼠、滅蚊和「小強」的招式，呼籲大家「清潔香港 Together」，Rondo指食環首次聽完都拍手掌。
財政有限　去動漫節，增加曝光率
「只要agency做到好content，客又肯信，咁其實所有政府部門嘅專頁都可以做得好好。」Rondo也「不分敵我」，很欣賞「大嘥鬼」的營銷手法。「佢唔只係得網上，係去到offline都做得好全面，有營食肆、巴士、垃圾徵費個膠袋等都見到佢個樣。我哋見到佢有咁多嘢做到，我哋知係要咁做，只係我哋要用自己方法。」在有限的財政預算下，五人只能採取土炮帶點偏鋒的宣傳手法，為阿德換取最多的曝光機會。他們曾帶阿德到動漫節，與其他cosplayer一同「相認」；Rondo本人也曾在炎炎夏日穿着阿德的公仔衫，讓同事拍攝「阿德」到球場撿垃圾和與小朋友一同踢波的畫面；為了幫阿德寫歌，五人不斷聽trap惡補，負責錄製卻謙稱不懂音樂的Ruck更只是在YouTube搜尋「how to make a song」。
「冇人要求我哋咁做，係我哋選擇去做。如果你唔係真心想做，你係唔會做呢啲黐線嘢。」有幾黐線？在凌晨四、五點以「阿德」身份回覆網友留言已屬閒事。Rondo笑說：「試過有晚我食緊飯，有人direct message阿德：『你首歌好好聽，可唔可以唱畀我聽？』我就去餐廳門口錄畀佢聽。但當觀眾見到你好認真去做呢樣嘢，佢哋會好中意」。
阿德「小編」這份工作，乍聽起來根本是「有返工冇放工」，但五人卻樂在其中。
對Rondo而言，做社交媒體營銷的意義在於，他能有一個平台宣揚正確的內容。「好似清潔咁，因為正確，你會做得更投入。雖然一個人執唔執垃圾係佢個人意願，我哋亦強迫唔到佢。但我哋嘅責任就係等佢哋袋落袋，洗咗佢腦先。」阿德的聲優Ceci也喜歡這份工作，「雖然清潔好似好小事咁，但如果我哋帶出嚟嘅訊息可以影響到一個人都好，再由一個傳去下一個。」現實中的五人也已「道成肉身」，被自己的創作洗了腦。公司中更多了項不成文規定：每當有人不記得丟垃圾，他們都會放阿德玩偶在旁合照，再示眾警惕。
在這場吉祥物爭霸戰中，暫時以當紅的任何仁跑出，代表前輩阿德的Rondo只撂下一句似是而非的說話：「大家都係幫政府宣傳，都好高興見到好多人一齊玩新嘢！」不過，阿德也豈會輕易罷休？五人決定乘勝追擊，繼續寫新歌，甚至幫阿德出EP。既然成為當紅歌手，阿德可以脫離毒男身份了嗎？「就算加感情線，都係失敗嘅感情線。因為愛情work唔到先好睇。可能阿德最後有血癌。」五人七嘴八舌之際，Rondo已想好片名──「綠色生死戀」。