【馮仁昭四圍超】有老有嫩逾2500人去玩修哥放水益長者

【蘋果日報】有大眾契爺之稱嘅86歲胡楓（修哥），依家除開工之外，私下仲會做義工，得閒探訪老友記。日前修哥、謝雪心同Joe Junior應邀去遊樂園玩，支持今年首辦嘅「記得唔記得」家庭同樂日，當日有超過800個家庭，逾2,500人扶老攜幼陪屋企嘅長輩，包括有認知障礙症嘅患者一齊去玩。
輸遊戲撒嬌
修哥參與活動之外，仲四代同堂一齊去玩，見佢同幾歲大嘅孫塞喺攤位玩掟波波，玩得好開心。現場嘅800多位長者，見到修哥就好似少女見到劉德華，表現好熱情，要求合照兼攞簽名，修哥就盡量滿足大家要求，最意外嘅係佢啲仔女同孫，冇諗過修哥仲咁受歡迎。
之後修哥同心姐喺攤檔教長者玩遊戲，唔少公公婆婆輸咗撒嬌，佢哋就好識做放水，照送禮物畀老友記，氹到啲長者好開心。總之修哥呢兩年擔任慈善基金愛心大使，積極幫助有認知障礙症患者，得閒就會搞活動。
撰文：馮仁昭
長青網 - 一站式長者及護老者生活資訊網站