黃芷晴：放下心頭大石 梁潔華移植骨髓成功

【蘋果日報】黃日華太太梁潔華在13年患上「急性骨髓性白血病」，經化療後已康復，不過上月初突然傳出梁潔華舊病復發。黃日華當時向傳媒表示太太因指數回升需要觀察。梁潔華女兒黃芷晴昨日在旺角出席活動，被問媽咪情況，芷晴表示媽咪身體已沒大礙，同時主動提到梁潔華今年8月已聽從醫生建議，接受骨髓移植手術：「手術好成功，好多謝捐出骨髓嘅人，依家媽咪已經返咗屋企休養，都肥返啲。」
芷晴與男友分手
移植骨髓後可能會出現排斥的情況，幸好梁潔華康復情況理想，芷晴表示：「幾好呀，但係未來仲要有一段時間繼續觀察，睇吓有冇出現排斥，暫時見到冇乜嘢排斥，今次手術成功，令我同爸爸暫時放下心頭大石。」
黃日華出名是愛妻號，芷晴坦言爸爸為媽咪付出很多：「之前有一年經常要出入醫院，陪媽咪去醫院覆診都係爸爸。」芷晴續言：「啱啱9月爸爸生日，同一日媽咪出院，係爸爸最好嘅生日禮物。」另外，芷晴透露上月跟拍拖兩年的男友Jimmy分手：「相處咗兩年半，大家經常鬧交，結果上個月分手。我唔心急拍拖，嚟緊聖誕仲可以多啲時間陪家人。」
翠如買湯慰男友
同場的黃翠如透露早前與閨密去澳洲旅行：「我哋去咗南澳九日，今次旅程係亂咁嚟，租咗架車見路就行，事前冇計劃，郊外收唔到GPS，又冇睇地圖，入黑先搵地方住。」翠如又自言旅行時，不斷收到男友蕭正楠的短訊。翠如回港後，買現成湯包給蕭正楠補償，她笑說：「佢好感動，但話唔好飲！」
採訪：曹家誠
攝影：沈健程
長青網 - 一站式長者及護老者生活資訊網站