【馮仁昭四圍超】姚子羚兜頭淋凍水張兆輝萬歲暖身

【蘋果日報】

張兆輝同太太GiGi結婚咁多年一直都好恩愛，出名顧家愛錫老婆仔女嘅輝哥，早排為搵食，成日要去內地拍戲，而同屋企人少咗相處時間，由於囝囝早兩年已經去咗外國讀書，輝哥想抽多啲時間陪屋企人，近年都多咗時間留喺香港拍劇，最近佢同姚子羚合作拍新劇《黃金有罪》，今次係子羚第一次同輝哥合作，最初子羚以為佢係一個好嚴肅嘅人，點知合作後，發現輝哥原來係百分百暖男，結果子羚話要搵輝嫂教路，睇吓點樣搵番個好對象。


幫手拍片睇效果

日前子羚同輝哥喺上環普慶坊開工，場戲係講子羚受到挫折，心情好差，於是走出街淋雨發洩。現場所見，呢個鏡頭拍咗好多次，每次拍完子羚都要即刻披毛巾同抹乾啲水。不過之後啲水越淋越大，有幾次因為出嚟效果唔夠好，工作人員就用水炮直接向子羚兜頭淋落去，呢排天氣涼，子羚拍得好辛苦。輝哥喺現場先係好細心咁幫子羚拍片，畀佢望吓出嚟嘅效果，之後再發揮暖男本色，出錢萬歲請晒工作人員嘆熱飲，一人一杯熱飲，唔需要好多錢，但喺凍冰冰嘅天氣，呢種送暖舉動，真係暖笠笠。


撰文：馮仁昭