【馮仁昭四圍超】明年一家三口陳凱琳爆嘉穎呷醋

【蘋果日報】陳凱琳（Grace）、劉穎鏇同孫慧雪前晚喺屯門出席平安夜活動，同fans一齊玩遊戲。剛公佈陀小嘉穎嘅Grace全晚神采飛揚，佢開心地話：「終於可以同大家講，收到好多人祝福，今年兩個人過，暗地裏有第三個，諗到出年好唔同就好溫暖。」Grace仲大爆老公鄭嘉穎：「我會忍手唔買BB嘢住，但佢一出街就睇BB嘢。佢同我講第時囝囝出咗世，唔好唔記得老公。」
「大條係臍帶」
早前有報道話佢哋為咗小朋友而搬咗去天后豪宅住，方便兩父子喺同一間學校讀書做「師兄弟」，Grace否認：「吓？唔係喎！冇搬屋。」係咪打算生完先搬？佢話：「未，依家嗰度空間仲夠住。」好多大肚婆都期待產檢，Grace一講到產檢就露出燦爛笑容，仲話老公已經搞清楚，睇超聲波大條嘅物體係臍帶，唔會再諗錯。
孫慧雪已經有一個囝囝，佢話未諗再追多件︰「明年工作都排得好密，暫時唔會住，老公都批准，過多兩年先。」雪雪仲話Grace都有問佢攞料：「Grace問我有冇做孕婦瑜伽，初時都日日上堂，後來因為BB頭圍太大，自然分娩唔到，結果都係開刀。」
撰文：馮仁昭
長青網 - 一站式長者及護老者生活資訊網站