新聞類別
港聞
詳情#
【蘋果日報】【補選對談】立法會九龍西補選結束逾一個月，政界、學術界對民主派再敗於建制派手下有不少分析，其中一個焦點是比較本土、年輕的選民寧願「焦土」或讓建制勝出，也不會含淚投票支持泛民候選人。有民主派認為，支持焦土論的年輕人等同任由港共控制香港，即使民主派如何改變也不會取得他們的票。連登討論區被視為支持本土、焦土的年輕網民聚腳處，他們批評泛民、拒含淚投李卓人，但不滿並非只限政治立場，還有對泛民在新移民、社福等民生政策立場的不滿。《蘋果》邀請被部份「連登仔」認為相對理解他們的議會陣線立法會議員毛孟靜，與學聯前副秘書長岑敖暉對談，從另一角度看本土年輕人與主流民主派之間的鴻溝。
記者：林俊謙
記者：你們是否知道為何本土派不投民主派?
毛孟靜：「我首先唔係好知道本土派包括乜人，有冇一本電話簿，畀我逐個打電話同佢傾？（岑：鄺葆賢就係話冇）。我唔知有冇當埋我都係（本土派）？我自覺有少少，我2013年1月就有我自稱嘅香港本土組織，我係講香港文化、語言、政制，總之香港人優先，我哋拒絕大陸化。
同埋我依家睇到嘅本土派，首先你要有底畀我睇到，例如梁天琦、游蕙禎同埋梁頌恆都係，佢哋係以本土嚟參選，我會自稱2016年嘅我，我話香港自決、拒絕大陸化，我覺得呢個係非常本土嘅取向，我係選到嘅，梁天琦之前喺新界東嘅補選（參選），同埋梁、游係用呢套理念入到立法會，呢啲我就覺得係本土。」
岑敖暉：「你講本土派，可能都係同民主派或者公民黨，有啲根本上嘅政見分歧，尤其關於主權問題，或者同北京嘅關係，其實真係有好唔同嘅政見。但我自己真係比較關心係，點解未必旗幟鮮明支持香港獨立，亦未必會完全認同本土派所有主張嘅朋友，都會對於民主派有咁多意見？呢個其實唔係需要你改變政見就做得到，而係你平時言行點樣去表現到，或者你嘅政治行為，點樣去表現到，你真係實踐緊你參選時嘅政綱同口號。」
記者：你們如何回應不少「連登仔」提出，要支持民主派就要做到的五大要求？
（取消每日150個新移民配額、將南亞難民關入禁閉營；新移民沒有港人福利，如綜援；規定新移民要學懂廣東話才可申請為永久居民；香港出生香港人優先入住公屋、居屋；要民主派為與本土、港獨割席認錯）
岑敖暉：「我認為自從2016年年頭嗰次補選後，有個別民主派政治人物嘅所作所為，其實係令到好多原本會支持民主派嘅選民失去咗好多信心。例如我哋講好多口號，我都有份去支持過嗰啲口號，其實發覺係好多時候都令人失望，例如「關鍵一席」或者視死如歸嘅言論，但最後可能係嬉皮笑臉就過咗去，我覺得巿民其實係好多都感受到。我哋朱凱廸團隊落區做嗰啲街坊集思會，或者之前去過《傘上：遍地開花》分享會，其實都有好支持民主派、好支持雨傘運動嘅街坊，其實都係有同樣意見。你唔會覺得佢哋係想香港即刻死，唔會覺得佢哋係焦土派，但其實有好多呢啲選民，係覺得對於一個政客失去咗好多信心。」
毛孟靜：「你話嗰五點，我希望唔係一刀切、一定要咁，唔係缺一不可就同你死過。150（新移民配額）嗰度，咁又唔好忽然變咗零，家庭團聚始終有啲啲嘅；你話聲稱係難民嗰啲要關起佢，呢個我有啲留餘地；你話新移民要學識廣東話先嚟（香港）呢，我諗起我哋好多中國人移民外國，有啲英文真係麻麻哋，啲老人家你唔可以話佢唔識英文就唔畀人去（外國），呢個（我）又有啲疑竇；你話香港人優先咁就一定㗎啦，我自己2013年1月已經有香港本土嘅小組織成立，所以要傾冇話唔傾嘅，但我覺得（上述建議人士）有少少惡囉。」
記者：你們如何看新移民問題？
岑敖暉：「其實喺我認知入面，都有好多基層街坊有啲情緒，因為其實喺基層社區，譬如屯門、元朗、上水呢啲地方，其實未必係最多新移民，但一定係好多遊客，真係會改變晒佢哋成個社區面貌，呢個其實正常人都會唔高興。我自已比較關心係民主規劃嗰個問題，其實民主規劃唔止土地，一個移民嘅政策，其實依家都係好唔透明，究竟審批單程證個程序係乜嘢、標準係點樣訂立，我相信應該有好多唔透明嘅空間。作為香港人想有政策、想有移民或者單程證審批權，其實應該一齊用民主機制去訂立一個開放同公平嘅制度，而唔係淨係針對內地人。」
毛孟靜：「依家正正唔係用一個標準，你話一套（審批標準）過，所有人都適合用，依家芬蘭嚟、外地嚟嘅，係真係有移民，或者總之係境外嘅身份，而中國嘅身份，就係中國之內，冇話移民呢樣嘢，所以香港一國兩制呢壇嘢，真係俾佢哋（中國政府）玩殘，佢哋需要時就用，唔需要時就唔用，好似嗰啲中國大陸嚟啲學生，佢需要時候，就話大家係同胞，大家血濃於水。一個唔覺意，佢哋就話自己係國際生，入咗國際生嘅名額，咁你究竟係國際抑或係同胞？係隨佢哋噏囉。」
民主派在立法會九龍西補選落敗後，包括李卓人在內的民主派老將力倡反思及聆聽本土聲音，希望爭取年輕人再次投票支持民主派，不過一班連登網民反應冷淡之餘，部份更大潑冷水：「其實呢班人近兩、三日不停喺度扮反思、扮和解、但永遠唔敢接觸嘅一樣嘢，就係好多選民已經完全對你哋失去信心。」有連登網民甚至認為連明年區選也要焦土：「區議會冇用、泛民甩轆、費事為建制塗脂抹粉、寧願等社區爛透然後逼居民醒覺、一齊唔參加同議會有關嘅活動。」毛孟靜、岑敖暉均認為焦土並非出路，民主派要團結同時要做到和而不同。
記者：如何看全面放棄議會、包括2019年區議會選舉，市民才會覺醒的主張？
毛孟靜：「唔得，置諸死地而後生，但係就冇得生，即係等於成日叫我哋總辭，係集體自殺，自殺後你話畀人聽你會重生？死咗嘞邊度有得生？你話社區爛透，其實唔會爛透，人哋有北京大水喉射住，可能呢度多盆花、嗰度多幾條草，都唔知幾乾淨企理開心都唔定。你話區議會都唔需要去選嘅話，總之係置諸死地，你係最後隻艇都俾人攞走埋，咁香港真係……香港2047年係年輕人嘅，我到時一定已經唔喺度，真係要年輕人堅持落去。」
岑敖暉：「我唔係好認為好多人好堅持覺得焦土work嘅、係出路，覺得乜都唔理、或者走晒，我哋變到好差，我哋就會浴火重生。焦土我認為好重要嘅條件就係我哋有大多數巿民支持，焦土先至有機會有效。呢兩次補選都係單議席、單票制、單對單，睇到香港起碼有一區係有兩次選舉結果顯示我哋支持唔過一半，喺人數比人少、人數比人弱嘅情況下，其實冇做焦土嘅條件。」
記者：民主派未來應如何檢討、整合？
毛孟靜：「最近有一個投票冇乜人留意，係有關立法會考察大灣區返嚟個報告，大家睇到民主派陣營入面嘅投票，贊成、反對、棄權或者不在席，係幾式投票齊晒，呢個投票嘅意義最終係無傷大雅，唔會話有驚天動地嘅後果，但睇到個取態，就係你點睇大灣區呢樣嘢，淨係呢樣嘢已經睇到（民主派分歧）。你話唔係，要去搵個人出嚟，邊個負責鞭策，總之要全部投票係綑綁、一統化，咁幾乎係搵嚟講、冇可能，因為如果你真係有咁嘅可能，咁不如有一個叫民主派黨，就唔使依家有各據山頭嘅意思。但我又唔覺現時係冇民主派呢樣嘢，你畀支筆我，我可以大力拗斷，但你畀一打筆我揸喺手叫我拗斷，咁真係冇可能。所以嗰種基本上嘅團結係仍然要喺度。」
岑敖暉：「其實（民主派）係冇一個對於香港民主運動比較更新或者根本嘅共同想像。如果你對香港民主運動或者香港定位有一個核心啲、基本啲嘅共識，嗰啲情況應該可以避免，例如香港點樣看待大灣區，或者被中南海強行規劃、消滅呢個情況，但就係喺唔同瓜葛、政見下各自表態。我覺得其實唔係原本嗰啲人投咗共或者變咗非民主派，而係我認為真係成個民主派冇一個根本嘅理解（記者：理解上如何可以做得更好？）我覺得短期內好難。」
記者：民主派經歷兩次九西敗選，未來民主運動應如何走下去？
岑敖暉：「我覺得首先要搞清楚，其實唔同香港人係有啲乜嘢唔同嘅諗法，我覺得呢個其實係我哋做得比較差，或者民主派好鍾意將一個帽子扣落一班人度，而冇去睇嗰啲啲分別，例如覺得嗰啲唔投票嘅人都係支持本土派。可能喺某一啲人士角度，你唔投票咁對面咪贏，咁你咪焦土囉；但可能對於佢哋嚟講，係我唔想再用我嘅授權去支持我並不支持嘅政治人物，但唔代表佢對於香港係完全冇關懷、冇關心，或者以後都唔參與民主運動。如果唔係每次事件發生後，就係一堆帽子互扣，你又扣吓我，我又扣吓你咁，之後就沉迷喺嗰啲，究竟我係咪你所講嗰啲人，而冇聚焦睇個問題點解出現。」
毛孟靜：「我哋（民主派）事實係門戶有別、取態不同，勉強真係冇幸福，我成日都講，合作要有互相嘅一種合作精神，唔係我逼你，你一定要同我合作，唔合作你就死，唔可以咁樣。我自己真心係相信自由主義，我相信每個人有自己選擇，你話未來有乜可以更加統一啲，我仍然係堅信，一講到民主、人權、法治呢啲大原則，我哋一定係百分百一致。」
長青網 - 一站式長者及護老者生活資訊網站
記者：林俊謙
記者：你們是否知道為何本土派不投民主派?
毛孟靜：「我首先唔係好知道本土派包括乜人，有冇一本電話簿，畀我逐個打電話同佢傾？（岑：鄺葆賢就係話冇）。我唔知有冇當埋我都係（本土派）？我自覺有少少，我2013年1月就有我自稱嘅香港本土組織，我係講香港文化、語言、政制，總之香港人優先，我哋拒絕大陸化。
同埋我依家睇到嘅本土派，首先你要有底畀我睇到，例如梁天琦、游蕙禎同埋梁頌恆都係，佢哋係以本土嚟參選，我會自稱2016年嘅我，我話香港自決、拒絕大陸化，我覺得呢個係非常本土嘅取向，我係選到嘅，梁天琦之前喺新界東嘅補選（參選），同埋梁、游係用呢套理念入到立法會，呢啲我就覺得係本土。」
岑敖暉：「你講本土派，可能都係同民主派或者公民黨，有啲根本上嘅政見分歧，尤其關於主權問題，或者同北京嘅關係，其實真係有好唔同嘅政見。但我自己真係比較關心係，點解未必旗幟鮮明支持香港獨立，亦未必會完全認同本土派所有主張嘅朋友，都會對於民主派有咁多意見？呢個其實唔係需要你改變政見就做得到，而係你平時言行點樣去表現到，或者你嘅政治行為，點樣去表現到，你真係實踐緊你參選時嘅政綱同口號。」
記者：你們如何回應不少「連登仔」提出，要支持民主派就要做到的五大要求？
（取消每日150個新移民配額、將南亞難民關入禁閉營；新移民沒有港人福利，如綜援；規定新移民要學懂廣東話才可申請為永久居民；香港出生香港人優先入住公屋、居屋；要民主派為與本土、港獨割席認錯）
岑敖暉：「我認為自從2016年年頭嗰次補選後，有個別民主派政治人物嘅所作所為，其實係令到好多原本會支持民主派嘅選民失去咗好多信心。例如我哋講好多口號，我都有份去支持過嗰啲口號，其實發覺係好多時候都令人失望，例如「關鍵一席」或者視死如歸嘅言論，但最後可能係嬉皮笑臉就過咗去，我覺得巿民其實係好多都感受到。我哋朱凱廸團隊落區做嗰啲街坊集思會，或者之前去過《傘上：遍地開花》分享會，其實都有好支持民主派、好支持雨傘運動嘅街坊，其實都係有同樣意見。你唔會覺得佢哋係想香港即刻死，唔會覺得佢哋係焦土派，但其實有好多呢啲選民，係覺得對於一個政客失去咗好多信心。」
毛孟靜：「你話嗰五點，我希望唔係一刀切、一定要咁，唔係缺一不可就同你死過。150（新移民配額）嗰度，咁又唔好忽然變咗零，家庭團聚始終有啲啲嘅；你話聲稱係難民嗰啲要關起佢，呢個我有啲留餘地；你話新移民要學識廣東話先嚟（香港）呢，我諗起我哋好多中國人移民外國，有啲英文真係麻麻哋，啲老人家你唔可以話佢唔識英文就唔畀人去（外國），呢個（我）又有啲疑竇；你話香港人優先咁就一定㗎啦，我自己2013年1月已經有香港本土嘅小組織成立，所以要傾冇話唔傾嘅，但我覺得（上述建議人士）有少少惡囉。」
記者：你們如何看新移民問題？
岑敖暉：「其實喺我認知入面，都有好多基層街坊有啲情緒，因為其實喺基層社區，譬如屯門、元朗、上水呢啲地方，其實未必係最多新移民，但一定係好多遊客，真係會改變晒佢哋成個社區面貌，呢個其實正常人都會唔高興。我自已比較關心係民主規劃嗰個問題，其實民主規劃唔止土地，一個移民嘅政策，其實依家都係好唔透明，究竟審批單程證個程序係乜嘢、標準係點樣訂立，我相信應該有好多唔透明嘅空間。作為香港人想有政策、想有移民或者單程證審批權，其實應該一齊用民主機制去訂立一個開放同公平嘅制度，而唔係淨係針對內地人。」
毛孟靜：「依家正正唔係用一個標準，你話一套（審批標準）過，所有人都適合用，依家芬蘭嚟、外地嚟嘅，係真係有移民，或者總之係境外嘅身份，而中國嘅身份，就係中國之內，冇話移民呢樣嘢，所以香港一國兩制呢壇嘢，真係俾佢哋（中國政府）玩殘，佢哋需要時就用，唔需要時就唔用，好似嗰啲中國大陸嚟啲學生，佢需要時候，就話大家係同胞，大家血濃於水。一個唔覺意，佢哋就話自己係國際生，入咗國際生嘅名額，咁你究竟係國際抑或係同胞？係隨佢哋噏囉。」
民主派在立法會九龍西補選落敗後，包括李卓人在內的民主派老將力倡反思及聆聽本土聲音，希望爭取年輕人再次投票支持民主派，不過一班連登網民反應冷淡之餘，部份更大潑冷水：「其實呢班人近兩、三日不停喺度扮反思、扮和解、但永遠唔敢接觸嘅一樣嘢，就係好多選民已經完全對你哋失去信心。」有連登網民甚至認為連明年區選也要焦土：「區議會冇用、泛民甩轆、費事為建制塗脂抹粉、寧願等社區爛透然後逼居民醒覺、一齊唔參加同議會有關嘅活動。」毛孟靜、岑敖暉均認為焦土並非出路，民主派要團結同時要做到和而不同。
記者：如何看全面放棄議會、包括2019年區議會選舉，市民才會覺醒的主張？
毛孟靜：「唔得，置諸死地而後生，但係就冇得生，即係等於成日叫我哋總辭，係集體自殺，自殺後你話畀人聽你會重生？死咗嘞邊度有得生？你話社區爛透，其實唔會爛透，人哋有北京大水喉射住，可能呢度多盆花、嗰度多幾條草，都唔知幾乾淨企理開心都唔定。你話區議會都唔需要去選嘅話，總之係置諸死地，你係最後隻艇都俾人攞走埋，咁香港真係……香港2047年係年輕人嘅，我到時一定已經唔喺度，真係要年輕人堅持落去。」
岑敖暉：「我唔係好認為好多人好堅持覺得焦土work嘅、係出路，覺得乜都唔理、或者走晒，我哋變到好差，我哋就會浴火重生。焦土我認為好重要嘅條件就係我哋有大多數巿民支持，焦土先至有機會有效。呢兩次補選都係單議席、單票制、單對單，睇到香港起碼有一區係有兩次選舉結果顯示我哋支持唔過一半，喺人數比人少、人數比人弱嘅情況下，其實冇做焦土嘅條件。」
記者：民主派未來應如何檢討、整合？
毛孟靜：「最近有一個投票冇乜人留意，係有關立法會考察大灣區返嚟個報告，大家睇到民主派陣營入面嘅投票，贊成、反對、棄權或者不在席，係幾式投票齊晒，呢個投票嘅意義最終係無傷大雅，唔會話有驚天動地嘅後果，但睇到個取態，就係你點睇大灣區呢樣嘢，淨係呢樣嘢已經睇到（民主派分歧）。你話唔係，要去搵個人出嚟，邊個負責鞭策，總之要全部投票係綑綁、一統化，咁幾乎係搵嚟講、冇可能，因為如果你真係有咁嘅可能，咁不如有一個叫民主派黨，就唔使依家有各據山頭嘅意思。但我又唔覺現時係冇民主派呢樣嘢，你畀支筆我，我可以大力拗斷，但你畀一打筆我揸喺手叫我拗斷，咁真係冇可能。所以嗰種基本上嘅團結係仍然要喺度。」
岑敖暉：「其實（民主派）係冇一個對於香港民主運動比較更新或者根本嘅共同想像。如果你對香港民主運動或者香港定位有一個核心啲、基本啲嘅共識，嗰啲情況應該可以避免，例如香港點樣看待大灣區，或者被中南海強行規劃、消滅呢個情況，但就係喺唔同瓜葛、政見下各自表態。我覺得其實唔係原本嗰啲人投咗共或者變咗非民主派，而係我認為真係成個民主派冇一個根本嘅理解（記者：理解上如何可以做得更好？）我覺得短期內好難。」
記者：民主派經歷兩次九西敗選，未來民主運動應如何走下去？
岑敖暉：「我覺得首先要搞清楚，其實唔同香港人係有啲乜嘢唔同嘅諗法，我覺得呢個其實係我哋做得比較差，或者民主派好鍾意將一個帽子扣落一班人度，而冇去睇嗰啲啲分別，例如覺得嗰啲唔投票嘅人都係支持本土派。可能喺某一啲人士角度，你唔投票咁對面咪贏，咁你咪焦土囉；但可能對於佢哋嚟講，係我唔想再用我嘅授權去支持我並不支持嘅政治人物，但唔代表佢對於香港係完全冇關懷、冇關心，或者以後都唔參與民主運動。如果唔係每次事件發生後，就係一堆帽子互扣，你又扣吓我，我又扣吓你咁，之後就沉迷喺嗰啲，究竟我係咪你所講嗰啲人，而冇聚焦睇個問題點解出現。」
毛孟靜：「我哋（民主派）事實係門戶有別、取態不同，勉強真係冇幸福，我成日都講，合作要有互相嘅一種合作精神，唔係我逼你，你一定要同我合作，唔合作你就死，唔可以咁樣。我自己真心係相信自由主義，我相信每個人有自己選擇，你話未來有乜可以更加統一啲，我仍然係堅信，一講到民主、人權、法治呢啲大原則，我哋一定係百分百一致。」
長青網 - 一站式長者及護老者生活資訊網站
留言 (0)
