中環在線：煌府母企CEO是靄華主席太太

【蘋果日報】香港唔少上市公司都係「夫妻檔」，一齊為公司打拼，但現時講男女平等，兩夫妻各自發展，都可以有自己嘅事業。好似今日起招股、主打婚宴酒席嘅煌府母企首灃控股（1703），其行政總裁陳曉平，另一身份就係靄華押業（1319）主席兼行政總裁陳啟豪嘅太太。兩夫妻各自擁有一間上市公司，應該係股壇第一次。
陳曉平持有首灃2.25%股份，以招股價0.5至0.75元計，其股份最多值1,875萬元，雖然唔太多，但陳曉平喺煌府嘅地位似乎舉足輕重。2006年陳首銘創立煌府，就搵嚟「同鄉」兼舊部陳曉平加入做行政總裁，負責建立及提升品牌形象、監督整體營運及採購管理。至於陳啟豪平日甚少講起太太，只提過兩人育有一子一女。
首灃主席同行政總裁除咗都係姓「陳」，兩人仲齊齊改名，陳曉平原名係陳淑萍，而首灃主席陳首銘原名係陳偉強。陳曉平話，已改咗名好多年，因為主席識得個「師傅」，改名對公司、個人運程都有幫助。煌府做到上市，睇嚟真係冇改錯名喎。
李華華
LiWaWa@AppleDaily.com
長青網 - 一站式長者及護老者生活資訊網站