新年訓示 黃夏蕙提防 扮豬食老虎

【蘋果日報】【迎豬接福】黃夏蕙每年都在年三十晚，出動到黃大仙祠搶上頭炷香，為迎接豬年，夏蕙姨日前以粉紅豬打扮率先到上址拜神，兼為香港求籤，她笑言要教大家提防小人「扮豬食老虎」，決親身演繹一段諧趣版《警訊》。
為港求得吉籤
夏蕙姨在袋中拿出一個老虎公仔，作狀吃掉，完美演繹一幕「扮豬食老虎」，她說：「害人之心一定冇，防人之心不可無，千祈要提防扮豬食老虎嘅人，我好小心，所以我好少遇到。做人千祈唔好貪心，如果啲人話畀錢你做生意，帶挈你發達，唔好制，呢個世界係冇不勞而獲，一定要腳踏實地。」
為香港求籤，夏蕙姨求得第45籤「古人王質遇仙」，籤文為：「採樵不意到雲巔，閒看敲棋二老仙，柯爛也思歸故里，山中七日世千年。」相士指是上吉籤：「籤文話王質無意間上山斬柴，喺頂峰見到兩位老人家捉棋，佢留低睇，一睇就到夜晚先返屋企，點知兩位老人家原來係神仙，當王質返到屋企發現冇晒人，因為山中方一日，世上已千年。呢個籤文嚟睇，香港出年係唔差，可能係無意中做咗一啲工程，但往後係會令香港得益，而呢啲好處唔係兩、三年間，係有十年、二十年好。」
自身好旺老公
相士也贈言肖雞的夏蕙姨在豬年事事順利，但要注意血壓、腎及腸道的健康問題。夏蕙姨也關心83歲肖豬老公潘炳烈，相士說：「冇相沖，你旺到先生。」夏蕙姨謂最大心願是旗下的慈善基金運作暢順，今年內完成興建一間老人院造福長者。
採訪：比華利
攝影：陳俊強
長青網 - 一站式長者及護老者生活資訊網站