【娛樂人物】李志剛喪母打擊　一度沉淪

【蘋果日報】熱愛音樂的李志剛，當年放棄收入不俗的則師工作，從電台由低做起，近年更由DJ撈到司儀，踩入電視、電影界。作為家中孻仔，自小受家人呵護，但原來他青少年時期曾不堪喪母打擊，試過一度沉淪、迷失，甚至離家出走，幸好音樂令他找回人生意義。
撰文︰祖李
攝影︰葉君海
李志剛日前在旺角接受《蘋果》專訪，51歲的他透露小時候沒有方向，畫則是受哥哥影響，姊姊就經濟支持他讀理工，自小在家人的呵護中成長。14、15歲經歷喪母之痛，令他一度沉淪︰「阿媽一直隱瞞腎病病情，佢入院好短時間就走咗，喺佢彌留時我哋至知咁嚴重，全家人都好震撼。呢個打擊，令我有段時間好迷惘、沉淪。」
太自我被飛
李志剛當時很不開心，想離家尋找新生活，幸好及時撥亂反正︰「阿媽喺度時唔畀我玩通宵，後來佢走咗，我冇王管咪玩到癲，阿哥鬧我更令我反叛，離家出走成晚唔返屋企，經常同班人不務正業，喺街坐天光。不過都係經歷嚟，冇迷失過就唔會識珍惜依家擁有。」
除了母親離世，30歲那年的感情挫敗，亦令李志剛急速成長，他坦言愛一個上一課。至今已單身八年的他，對緣份看得淡︰「其實都想拍拖，但真係撞唔到，自己鍾意對方又未必揀你。不過嗰次被飛令我學識唔可以太自我，可能因為屋企人好就我，事事以我為先，後來分手，至發覺自己忽略咗伴侶感受。佢分手好決絕，令我明白要珍惜一段關係，就算分手都要處理得好啲，要畀啲預兆對方。我對感情一向好有自信，嗰次話畀我知，世事冇絕對。」
易得罪藝人
沒有愛情，但音樂工作令他很愜意，做DJ後他在電台節目訪問過無數藝人，不過都試過直話直說得罪人︰「好怕同佢講笑但當真嘅藝人，我只想搞氣氛，但人哋以為我笑佢，仲嬲爆不相往來。」他指音樂可以帶給人快樂，本月24日他會為勵智協進會的民歌慈善活動做司儀。」
場地提供︰丸十牧場
長青網 - 一站式長者及護老者生活資訊網站