【娛樂人物】黃百鳴閻奕格　父．女情

【蘋果日報】電影《搭錯車》當年大受歡迎，事隔36年，黃百鳴將此片改編成音樂劇，6月搬上舞台，狄龍扮演「啞叔」和閻奕格扮演的「阿美」演繹父女情。黃百鳴坦言：「樹欲靜而風不息，子欲養而親不在，係《搭錯車》嘅主題，希望觀眾睇完之後，第一件事返去搵爸爸飲餐茶啦。」
圓父心願
黃百鳴和閻奕格日前接受《蘋果》專訪，談到戲中的父女情，黃百鳴感觸地說：「我爸爸已經唔喺度，有件事我都擺喺心，細個佢同我講鄉下嘅古仔，我未去過冇感情，佢一直希望有日我帶佢返鄉下，但我冇做呢件事，直至我拍《葉問》到佛山做資料搜集，返嚟先知鄉下喺佛山隔鄰。我有啲自責，當時爸爸已經坐輪椅，我終於帶爸爸返鄉下，佢同鄉里講鄉下話好親切。返嚟冇耐佢離開咗，但總算還咗佢心願。」
因為唱功了得，黃百鳴找來閻奕格做女主角，他說：「因為當年《搭錯車》由蘇芮唱係好有功力，要搵番咁有功力嘅歌手唔易，我覺得格格可以勝任。」格格說：「多謝，我唔怕比較，自己被認識就係喺比賽翻唱人哋嘅歌，最緊要自己唔好同佢比，因為我哋係唔同類型歌手，今次唔係歌唱比賽騷飆高音，焦點係情感。」
經歷相似
問到有否看過《搭錯車》？90後的格格說：「梗係有，咁經典，覺得女主角同自己經歷有啲相似，譬如佢要做出好多重要選擇，如繼續唱歌定用更多時間陪屋企人，而我同爸爸嘅感情都好好，細個成日話『下次先食飯，好忙！』但電影結局大家都知道個心揦住，我好唔希望係咁，一直只顧工作而忘記咗屋企人。」
撰文：余燕儀
攝影：仇志德
化妝：julie.H of J LAB（閻奕格）
髮型：Haysses Ip of HAiR（閻奕格）
場地提供：8度海逸酒店
長青網 - 一站式長者及護老者生活資訊網站