新聞類別
娛樂
詳情#
【蘋果日報】
羅家英曾經喺05年患上肝癌，當年接受手術切除部份肝臟，戰勝癌魔。康復後家英哥繼續工作，愚人節當日仲喺微博留言悼念哥哥，言談間透露自己瞓喺醫院：「4月1日！懷念張國榮，我躺在醫院病床上，想起與哥哥第一次合作《金枝玉葉》，再後的《色情男女》、《金玉滿堂》等等，多少年了，斯人早逝，幸留光影讓我們懷念，在天堂快樂嗎？」
身為契女嘅楊玉梅前日到聖德肋撒醫院探望，並喺Ig貼出同家英哥嘅合照：「阿爸你要保重身體，我們很擔心你，要乖乖休息多點。」
阿姐煲湯
有指家英哥發燒入院，記者致電家英哥，問到現時情況，說話有啲氣若游絲嘅家英哥話：「冇乜事啦，有心，依家退咗燒，我聽日都出院㗎喇。」佢之後接受傳媒訪問，自揭並非一般發燒，佢指早前要做前列腺細胞檢查，進行一個穿刺手術後，到橫店開工期間細菌感染，加上欠缺休息，所以便發高燒至超過40度。
阿姐汪明荃噚晚錄影節目時，交代家英哥情況：「佢依家喺醫院休息，已經退咗燒，冇乜事喇，之前發高燒發到40度，我幾驚呀！」阿姐指家英哥早前到橫店拍戲時受到細菌感染，為免影響進度，寧可日間返片場開工，夜晚回醫院接受消炎治療，估唔到家英哥一返港又發高燒，所以即刻入院治療。阿姐指家英哥入院撞正佢神功戲演出，但都有抽時間煲湯水同探佢。
撰文：馮仁昭
回應 (0)
