【姐匙Talk】影帝借衫唔追唔還

【蘋果日報】「木軍」出名愛妻，人前人後成日讚老婆，對老婆又夠專一，緋聞少之又少，形象好加上圈中老友多，個個都畀面佢。


木軍呢個超級好男人，雖然已到中年，但一直keep得唔錯，冇乜走樣、身形又弗，原來佢後生時已經好貪靚，不過佢啱啱出道嗰陣屋企環境唔好，冇乜錢打扮，但佢同朋友去街已經成日去逛名店，睇靚衫同靚錶，仲話第時有錢一定要買邊撈嚟威吓。


見靚嘢雙眼發光

雖然冇錢買靚嘢，但嗰陣見親佢都着到身光頸靚，點解咁把炮？原來佢一味靠借，但凡見到朋友有靚嘢，佢就會雙眼發光，問長問短之餘，仲唔怕唔好意思同人借嚟着，真係衫、褲、鞋、錶，乜都唔放過，不過借完就唔係即刻還，要人哋猛追，木軍至會還，有時又話唔記得，拖足幾個月至畀番人。後來佢攞到獎，事業發展越來越好，搵到錢就戒咗「借」癮。


雖然木軍着衫唔見得誇張，但一套簡單嘅casual wear，佢都喺屋企襯過晒至出街，佢最鍾意玩黑白，話簡單得嚟又可以好型好cool喎。雖然木軍經常出入名店，又酷愛名牌，對某兩個牌子仲情有獨鍾，但佢好多時買嘢都揀畀老婆，真係一位好老公。


撰文：Jessie

本欄逢周五刊登

姐匙Talk

我姐匙縱橫歌影視幕後，咁多年嚟冷眼旁觀，娛樂圈大小事都走唔過我雙眼，真係頂唔順要爆啦！歡迎大家嚟剝花生。