【娛樂人物】陳潔儀習慣性消失

【蘋果日報】陳潔儀是新加坡天后，舞台上揮灑自如，現實卻極為低調內斂，去年她自揭與結婚14年的富商老公離婚，回復單身後，46歲的她強調沒有放棄愛情，但享受獨處。日前她來港排練本月公演的舞台劇《利瑪竇》並受訪，自言對男女關係重新反思，又表示會工作一段時間後慣性消失，來鍛煉出金剛不壞之身。
撰文︰祖李
攝影︰陳俊強
沒嘗過失去，就不懂珍惜！台上華麗、女人味十足的陳潔儀，經歷過婚姻失敗，對人生有所領悟︰「以前對自己唔了解，後嚟至發現自己適合單身。我係浪漫嘅人，感情一撻即着，所以唔會放棄愛情，但又唔想對方黏得太實，呢個係我嚮往嘅愛情。」
找對的人不易
綵排舞台劇《利瑪竇》期間，不斷要與演員及工作人員磨合，令陳潔儀反思很多︰「情侶相愛亦相敵，撇開兒女私情，我好容易放低自我，去成就同包容身邊人，但涉及感情就好多拉鋸。我會記住綵排時放下自我、重生嘅感覺，日後感情層面，我也會跟呢個方向走。」
陳潔儀坦言現在有約會異性，但要找對的人不容易︰「我嘅人生係由身邊冇一個人到有一個人，再由有一個人變冇一個人，咁就學會成長。依家感情成熟咗，以前比較自我，冇顧慮到對方，依家會知進退，適度畀大家空間。」年輕時她很叛逆、不易妥協，現在戮力學習化身太極，達至陰陽調和︰「叛逆唔係好事，但佢係成長一股力量，年輕時佢會帶住你衝、克服恐懼，依家堅守自己思想之餘，亦學識包容人哋。」
從小到大，陳潔儀都是綁不住的，母親經常罵她「你係一匹野馬」，她反而沾沾自喜。原來小時候表演慾強的她，天生性格害羞︰「我好誇張，小時候見到陌生人會匿喺媽咪背後，親戚嚟我屋企，我會坐立不安匿入房，佢哋裝我，我會失控咁喊。」
怕焦點放身上
25年的藝人生涯，陳潔儀形容因為內向不算「正常藝人」︰「依家仲有心理掙扎，台下我好怕人將焦點放喺我身上。」所以工作一段時間，她會慣性消失。04年她退出樂壇兩年，完成大學學位，又做過公關，感受白領儷人生活︰「當時覺得熱愛音樂嘅心被磨損，自己只剩空殼，再唔離開就會討厭唱歌。」由歌后變平凡人，鍛煉出金剛不壞之身︰「別人目光只係一層皮咁厚，穿過去就好自由。當我貼地生活，生命就多咗材料。」
陳潔儀指剛入行時曾遭父母反對，令她對藝人戒心重重，因為怕成為媽媽口中自甘墮落的人，她說︰「媽咪好毒，搞到有陰影，依家明白每個圈子都有好人、壞人，最近識咗鄧萃雯，同佢一見如故。」因為鄧萃雯穿針引線，她認識到劉松仁及演出《利瑪竇》，緣份就是這樣微妙。
髮型：Bowie Lo of Fifth Salon
化妝：Alvin Goh
造型：PIPA
服裝提供：Vivienne Tam、Stuart Weitzman
場地提供︰帝樂文娜公館
長青網 - 一站式長者及護老者生活資訊網站