【姐匙Talk】阿直一朝得志犯眾憎

【蘋果日報】之前曾經有前輩話攞咗獎會衰三年，當然你可以話係一命二運三風水，有啲可能係條命生成，注定唔可以太高調；不過亦有可能係個人問題，一朝得志就語無倫次，以為自己真係一炮而紅，行步路都當自己係巨星，對身邊嘅人呼呼喝喝，結果唔使講，喺犯眾憎嘅情況下，又點會有運行？
捱咗十幾年嘅「阿直」，幾乎瓣瓣都做晒，不過一直都撈唔起，直到近年去咗拍劇，先叫做有番啲成績。查實佢咁多年都半紅不黑，唔係輸喺演技或者外形，而係輸喺自己嘅性格，佢成日同身邊啲人講，覺得自己好掂，只係爭一個機會，一個賞識佢嘅人，慢慢仲怨埋身邊嘅人幫唔到手。
本來阿直喺上年拎咗獎，可以話叫做捱出頭，以為真係苦盡甘來，識得珍惜身邊事，點知原來係沖昏咗自己頭腦。一哥上身嘅阿直，成日想啲人將啲焦點擺喺自己身上，只要唔啱佢心水，即刻發晒癲咁狂鬧，話人哋做嘢冇深度。把口話唔介意講感情，但係個心唔鍾意人哋只係寫戀情，試過有人勸佢，叫佢改吓呢種性格，結果唔使講，梗係反面收場啦！
撰文：Jessie
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。
長青網 - 一站式長者及護老者生活資訊網站