【爆相爆片】謝安琪帶兒子　搭馬鐵身教

【蘋果日報】謝安琪（Kay）之前停工幾年做湊仔婆，張繼聰因為事業起飛搵到錢，足以照顧一家生活，不過搵到亦唔一定要大使，生活都可以好平民化。舊年全面復工嘅Kay，雖然貴為一線歌手，但同普通人一樣都會搭公共交通工具。日前就有讀者報料見到佢同11歲大仔張瞻搭馬鐵，因為張瞻當時着住附近私立學校嘅校服，所以估當時Kay係湊仔放學。
英文溝通
《蘋果》讀者梁太透過「爆相爆片」，直擊日前接近中午，化咗淡妝同紮起頭髮嘅Kay同囝囝喺馬鐵綫嘅馬鞍山站上車，梁太話：「謝安琪喺月台個路綫牌同個仔一邊講、一邊手指指，可能教緊個仔點搭車。我聽到佢哋兩母子多數用英文交談，有個fans認到謝安琪，主動搵佢合照，佢都好nice咁同個fans自拍。」
梁太仲話Kay同囝囝上車後，雖然車入面有好多座位，但佢哋兩母子都寧願企都冇坐低，仲用手機玩自拍，其間張瞻捉住車廂扶手轉嚟轉去，又似係學緊爹哋張繼聰玩健身，張瞻同媽咪講：「我好似爹哋呀！」梁太又話：「冇幾耐有位老伯伯上車，張瞻主動叫伯伯坐，不過嗰位伯伯話唔使。之後老伯伯話謝安琪同個仔好似樣，又問張瞻讀幾年班，張瞻就答話自己讀中一，張瞻睇落都好有禮貌、好乖、好有家教。」最後Kay同囝囝就喺大圍站落車。
長青網 - 一站式長者及護老者生活資訊網站