【娛樂人物】鄧萃雯單身BB

【蘋果日報】53歲的鄧萃雯近年專注事業，感情生活一片空白，她表示很享受單身生活，並認為一個人也可以很快樂。雯女的擇偶條件，她需要自信的男人，重要過外在條件，雖然被標籤為「強勢女人」，卻自爆心底也想做BB。
鄧萃雯離開無綫回復自由身，最近跟陳錦鴻拍攝ViuTV劇集《婚內情》，扮演兩夫妻，劇中的她為了愛的承諾，更不惜安排丈夫出軌。
雯女指從前盲婚啞嫁的婚姻比現在更長久：「嗰種堅持好勁，明知委屈都會堅持落去。」如面對丈夫出軌，雯女坦言會找出答案：「細路女嗰陣，可能會好快決定分開，依家嘅我會想知道原因。好多朋友同我講，兩個人結咗婚，唔係咁坦誠，唔係乜嘢都可以講，我覺得有啲匪夷所思，我係要溝通嘅人，因為唔攞個問題出嚟傾，問題唔會消失。如果個出軌問題係我帶出嘅，未必唔可以原諒，有時候出現唔好嘅事，可能會令婚姻更好。以前盲婚啞嫁，佢哋死都唔會離婚，係一份好勁嘅堅持，就算委屈都唔會放棄，其實同減肥一樣，堅持先會瘦。婚姻一樣，你要睇到晒所有衰嘢，先好講I do。」
「可能床上先relax」
雯女發現不少男士選擇飲酒減壓，也不願意與太太分享：「男人會覺得將問題帶番屋企，就會衍生更多問題，因為個老婆仲煩，佢哋唔認為溝通有用。一樣米養百樣人，每對情侶都係個別嘅，有啲男人可能要喺床上面先最relax、先可以同你傾，都係要花時間同心機去相處。」
對於第三者，雯女說：「每個人有唔同動機，有啲人純粹要愛，所以唔理其他人；有啲可以接收錯誤訊息，以為自己先係提供到對方需要嘅嘢嘅嗰個人；有啲人破壞你之後就開心。好似每個去教會嘅人嘅intention都唔同，有啲人想去搵好男人；有啲想去識好老婆；even基督徒都係咁，更何況平常人？有邊個唔想要又靚仔又大隻又細心又man嘅萬能superman？既然一個人提供唔到，就搵幾個人去提供，我需要一個可以依靠而穩定嘅男人，但我唔可能要求佢陪我去跳bungy jump，因為佢要係個boring嘅人，先有呢種穩定。」
「互相要低能吓」
近年保持單身，雯女笑言未遇到無所不談的對象：「唔係咁多人願意去傾，以前嘅我專注喺事業，冇耐性、冇時間去明白對方。依家知道乜嘢係愛，亦都有時間，但就冇遇到。」她享受單身生活，認為一個人也可以很快樂：「好多男人都太玻璃心，事業好成功、搵到好多錢，但就要搵個依靠佢嘅女人，最好唔好咁獨立啦。我需要一個有自信嘅男人，重要過外在條件。」常被標籤為「強勢女人」，雯女心底希望間中做個小女人：「當然互相都要低能吓，我唔可以成日都做保護佢嘅母雞，有時我係BB，有時佢係BB，係喺最親密嘅人面前先可以表現嘅一面。」
撰文：盧妹
攝影：陳俊強
長青網 - 一站式長者及護老者生活資訊網站