【姐匙Talk】亨利鹹豬手老婆縱容

【蘋果日報】歌手「亨利」唱歌唔見好出色，惟有撈過界踩入公仔箱拍嘢，撈吓撈吓又有啲起色，起碼叫做多咗人識。最近亨利接咗套新戲，雖然對手唔係最當時得令嘅花旦、小生，但好多位都係好戲之人，加埋仲有幾位身材唔錯嘅靚女演出，亨利拍埋去，其實算係最平庸嗰位。
已結婚嘅亨利，平時好少孖老婆一齊出嚟見人，但就被認為夫婦恩愛，男嘅形象都唔差。不過今次拍戲終於露出狼相，抽人水兼鹹豬手，而受害者都係啲後生女臨記。有幾次亨利用幫人按摩膊頭做藉口，原本按吓膊唔可以話係抽水，不過衰在隻手唔多規矩，按按吓就掃背，仲要發生好幾次。
咁啱有次唔好彩俾「小新」見到成個過程，個女仔唔敢出聲反抗，只係左閃右避，小新睇唔過眼，大大聲同個後生女講：「如果你覺得唔舒服可以出聲，又或者選擇離開呢度。」於是個女仔就起身行開咗。但最耐人尋味嘅係，當時亨利老婆都在場，竟然見到都扮冇嘢，某程度上係助長老公越嚟越放肆。好彩有小新出手，自嗰次之後，亨利就變得神憎鬼厭，難得連善良老前輩都討厭佢，每次對戲都玩佢一餐。
撰文：Jessie
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。