各路人馬 拱照金利豐

【明報專訊】黃金集團（1031）噚日舉行酒會，慶祝成功將金利豐注入上市公司，好客嘅老闆娘朱李月華，廣邀各路人馬出席，小琴眼見差唔多迫爆會場，場面可以話空前墟冚。

金利豐向來係城中富豪同唔少二、三線股份嘅「御用」券商，朱太就更加係人脈極廣，出席嘅人不少係香港股壇的話題人物，除咗賭王四太梁安琪同殼王陳國強之外，仲有澳博（0880）CEO蘇樹輝、中星（0055）主席薜嘉麟、伯明翰（2309）主席楊家誠、本地著名莊家高振順等等等等……。

富豪「鐵三角」 獨欠大劉

不過，向來對朱太青睞有加嘅富豪「鐵三角」之中，「彤叔」鄭裕彤同中渝系大股東張松橋都有出席，唯獨「大劉」劉鑾雄無現身，至於向來喜愛「鋤啤」嘅彤叔亦無逗留好耐，影完相坐陣就離開咗。

黃金集團上個禮拜公布引入平保（2318）同西京做策略股東，平保孫建一同劉央都有出席捧場，小琴就有問朱太同彤叔咁熟，點解唔搵彤叔先呢？佢就笑笑口話佢都想，但因為之前要等注入金利豐單刁完成晒先喎！

報料電郵﹕piano@mingpao.com