意馬通過「吞羊」 之後搞作多多

【明報專訊】意馬國際（0585）失意於阿童木之後，由「紅籌之父」梁伯韜入主兼「吞羊」，更有誠哥同榮太子在內嘅富豪團科水，粒粒皆星，小股東點會唔支持呢？噚日意馬股東就一致通過以最多10.46億元收購擁有內地人氣動漫《喜羊羊與灰太狼》肖像權的動漫火車集團，以及向長江生命科技（0775）、榮智健、合和（0054）副主席何炳章等批股以支付代價。

收購完成後意馬仲多多動作，一口氣簽咗兩套授權協議，開拍《我愛灰太狼》嘅真人版電影同《寶貝女兒好媽媽》卡通電影，又授權安排喜羊羊嘅角色，由今年9月起喺內地巡迴做嘉年華表演。

又拍戲？意馬使唔使出錢先？梁伯韜在股東後語重心長咁講，以前意馬攞版權返嚟做高風險嘅電影投資，家就180度掉番轉，賣（喜羊羊）版權出去賺低風險嘅錢，意馬家專注做brand awareness，即係令更多人識喜羊羊。

佢又話，無論做電影、電視都好，其實都係marketing，然後靠賣周邊產品例如書籍、甚至手機app嚟賺錢，當然賣座嘅話仲有分紅添，仲話收購動漫火車後，意馬出年有望轉虧為盈添。轉行做實業嘅梁伯韜，都脫不了投行家嘅推銷口技，唔怪得得掂一班大孖沙啦。