區常秘澄清積金中介人監管

【明報專訊】小琴等了又等嘅強積金半自由行終於進入直路，上個禮拜財經事務及庫務局上立法會，就點樣立法規管強積金中介人聽意見，最快出年就落實喇，到時管理費就有望降低。

有議員問政府點樣可以監管公司，唔係剩係罰前線人員，但背後嘅高層照可以收花紅。財經事務及庫務局常任秘書長區璟智答佢，會要求受託人要有個高層人員專責監督中介人嘅操守，若前線涉及不當行為，公司一樣要孭飛。

不過，區常秘就同小琴澄清，佢並非如4月5號《明報》嘅報道話「該專責人員的薪酬一定不可以與強積金銷售額掛鈎」。小琴聽番立會的錄音帶，當日積金局執行董事馬誠信（Darren McShane）﹕「受託人唔會因基金轉移收取費用，咁佢哋就唔會可以將薪酬建基於呢啲費用上面。」小琴借此還常秘清白。

經過雷曼迷債事件之後，好多人都對過分進取嘅銷售手法好有保留。至於政府同積金局仲有冇其他高招，對付跑數同操守之間嘅利益衝突，大家就要拭目以待喇。