政府派六千蚊 四成半投資者儲起

【明報專訊】當財爺宣布向港人派6000元嘅時候，小琴興奮到不得了，錢都未到手已經預支咗嚟買手袋。不過有調查發現，有成四成半有經驗嘅投資者表示會將6000儲起來慢慢令佢增值。

其次，有26％人話會攞6000蚊去旅行，而仲有15％人會用嚟投資。睇黎小琴都要學吓唔好咁購物狂，寅支卯糧囉。

每3個月做一次投資者信心調查嘅摩根資產管理話，呢個結果同大家嘅預計唔同，可能係因為調查期間，日本爆發海嘯同核危機，以及阿拉伯嘅唔穩定因素，令大家對前景冇咁樂觀。今年3月嘅信心指數係120，比舊年12月嘅126略略低，仍然屬於樂觀。

港人對港股十分樂觀

不過大家對港股都係幾樂觀，有超過四成人覺得至9月底，恒指可以企喺24000點樓上，低過22000點嘅只有唔夠一成。咁摩根自己點睇呢？佢哋嘅大中華基金經理葉義信就睇好內地企業，尤其睇好內房同內銀股，因為內地通脹可能喺第2季見頂，如果通脹放緩，呢兩類股份會受惠。